जाजरकोट । १६ महिनाभित्र निर्माण पूरा गर्ने सहमतिअनुसार डोल्पा ठूलीभेरी नगरपालिका–८ रुपगाढ खोलामा निर्माण थालिएको पुल निर्माणको अझै टुङ्गो छैन ।
चार वर्षअघि निर्माण शुरु गरिएको पक्की पुल निर्माण अधुरै छाडिएको छ । वि.सं २०७२ मा पुल निर्माणको जिम्मा सञ्जीवनी कन्स्ट्रक्सनले लिएको थियो । सञ्चालक गौरी उप्रेतीले एक वर्ष ६ महीनाभित्र सो पुल निर्माण पूरा गर्ने जिम्मा लिएका थिए ।
पुल निर्माणका लागि साविक जिविसले तीन करोड विनियोजन गरेको थियो । जिविस र जिल्ला प्राविधिक कार्यालयको खारेजीसँगै पुल निर्माणको जिम्मा कसले लिने भन्ने विषयमा लामो समयसम्म टुङ्गो नलाग्दा निर्माण अधुरै रहन गएको हो ।
जिविस र प्राविधिक कार्यालयको खारेजीसँगै पुल निर्माण गर्न निर्माण कम्पनीलले विभिन्न बहाना गरिरहेका छन् । कम्पनीले पुल निर्माणको जिम्मेवारी डोल्पाकै हिम बुढालाई दिएको छ । पुल निर्माणको समयावधि २०७४ चैतमा सकिएको थियो ।
अहिलेसम्म तीन पटक निर्माणको म्याद थपिएको छ । तेस्रो पटक म्याद थप्दासमेत पुल निर्माणको काम अघि बढ्न सकेको छैन । जिल्ला समन्वय समितिका प्रमुख शेरबहादुर बुढा साविक जिविसले गरेको विस्तृत नक्साङ्कन नमिलेकाले पुनः गर्नुपरेको बताए । चालू आवमा सो पुलका लागि बजेट विनियोजन गरेको छैन ।
पुल निर्माण नहुँदा सदरमुकाम दुनैसम्म यात्रा गर्न असहज भएको छ । काठको सहारामा सवारीसाधन वारपार गराउन जोखिम हुन्छ । कामको जिम्मा लिएका स्थानीय व्यवसायी हिम बुढा कामको रकम नपाएका कारण पुल निर्माणमा ढिलाइ भएको बताए ।
साविक जिविसले व्यवसायीलाई दुई करोड ७० लाख भुक्तानी दिएको बताइएको छ । ‘पेश्कीस्वरूप लिएको रकम ढुङ्गा, गिट्टी तथा बालुवा सङ्कलनमा खर्च भइसक्यो’, बुढाले भने, ‘पुलको दुवैतर्फको पिलर निर्माणको काम सकिएको छ ।
बाँकी रकम भुक्तानी भए पुल निर्माणलाई तीव्रता दिन्छौँ ।’ जाजरकोट–डोल्पा सडकखण्डभित्र पर्ने सो पुल निर्माणका लागि स्थानीयवासीले दबाब दिँदै आएका छन् ।
यो खबर पढेर तपाईलाई कस्तो महसुस भयो ?
प्रतिक्रिया