एसिड आक्रमण : खातुनको उपचारको लागि सांसद यादवद्वारा ५० हजार सहयोग

लोकपथ संवाददाता

२०७६,भाद्र,२०,शुक्रवार १५:०१

काठमाडौं- एसिड आक्रमणमा परेकी वीरगञ्ज महानगरपालिका–३ कि १५ वर्षीया किशोरीको उपचारका लागि पर्साका सांसद प्रदीप यादवले ५० हजार रुपैयाँ नगद सहयोग गर्नुभएको छ । शरिरको विभिन्न भाग एसिडले जलेर काठमाडौं ल्याईदै गरेकी खातुनलाई उपचारको लागि सांसद यादवले ५० हजार रुपैयाँ नगद सहयोग गर्नुभएको हो ।

स्कुल हिँडेकी खातुन माथि एसिड प्रहार भएको थियो । वीरगंज महानगरपालिका २ छपकैया घर भएकी त्रिभुवन हनुमान माध्यमिक विद्यालय रेसम कोठीमा कक्षा ९ मा अध्ययनरत मुस्कान खातुनमाथि एसिड प्रहार भएको थियो । एसिड प्रहारबाट घाइते भएकी बालिकालाई उपचारको लागि नारायणी अस्पताल वीरगञ्ज लगिएकोमा थप उपचारको लागि कीर्तिपुर अस्पताल रिफर गरिएकोमा काठमाडौं ल्याइदै छ । एसिड आक्रमण परेकी खातुनको अनुहार पेट, पाखुरा, मुख र छातीमा समस्या देखिएको छ ।

वीरगञ्ज महानगरपालिका–६ गणेशमान चोकमा सम्साद मिया र सोही महानगरपालिका–२ छप्कैया बस्ने माजिद आलमले कक्षा ९ मा अध्ययनरत किशोरीलाई एसिड प्रहार गरेका थिए । एसिड प्रहार गर्नेमध्ये १६ वर्षीय सम्साद मियालाई प्रहरीले पक्राउ गरेको पर्सा प्रहरीका एसपी सोमेन्द्रसिंह राठौरले बताए । अर्का एकजना माजिद आलमको खोजी कार्य जारी छ । प्रेम सम्बन्धका कारण एसिड प्रहार भएको हुनसक्ने बताइएको छ । यसविषयमा प्रहरीले अनुसन्धान गरिरहेको छ ।
यो समाचार पढ्नुहोस् ।