सम्पदा यात्रालाई विस्तार गरिने

काठमाडौं । सरकारले भक्तपुरबाट थालनी गरिएको रात्रिकालीन सम्पदा यात्रालाई उपत्यकाको अन्य शहरमा विस्तार गर्ने भएको छ ।

काठमाडौंको मौलिक संस्कृति र सम्पदाको जगेर्ना गर्दै पर्यटन प्रवद्र्धन गर्न उपत्यकाको अन्य शहरमा यसरी रात्रिकालीन सम्पदा यात्रा विस्तार गर्न लागिएको हो ।

सङ्घीय संसद्को संयुक्त बैठकमा आज आगामी आवको बजेट प्रश्तुत गर्दै अर्थमन्त्री डा. युवराज खतिवडाले राष्ट्रिय संस्कृति सङ्ग्रहालय कीर्तिपुरको निर्माण कार्य अघि बढाइने बताएका छन् ।

उनका अनुसार सरकारले उपयुक्त स्थानमा राष्ट्रियस्तरका बृहत् शहीद पार्क निर्माण शुरु गर्ने तथा विश्वसम्पदा सूचीमा परेको सम्पदाको संरक्षण र सम्वर्द्धन गर्नेछ ।

सरकारले बृहत्तर लुम्बिनी क्षेत्रको गुरुयोजना तथा रामग्राम गुरुयोजना कार्यान्वयनमा ल्याउने भएको छ ।

यस्तै आवमा लुम्बिनीमा निर्माणाधीन पाँच हजार क्षमताको ध्यान केन्द्र तथा सभाहलको निर्माण सम्पन्न गरिने उनले बजेटमा उल्लेख गरेका छन् ।

सरकारले आगामी वर्ष तिलौराकोटलाई विश्व सम्पदा सूचीमा समावेश गर्ने प्रक्रिया अघि बढाउने भएको छ ।

जानकी मन्दिर क्षेत्र र मिथिला संस्कृतिको संरक्षण र विकासका लागि गुरुयोजना तर्जुमा गरी कार्यान्वयन गरिने जनाइएको छ ।

देवघाट, पाथीभरा, रुरु, खप्तड क्षेत्र, बराह क्षेत्र, काँक्रेविहार, हलेसी गौरीशङ्कर लगायतको धार्मिक क्षेत्रको विकासका लागि आवश्यक रकम विनियोजन गरिएको अर्थमन्त्री डा. खतिवडाले बताए।

रामायण परिपथ निर्माणको काम शुरुवात गर्न तथा अमूर्त सांस्कृतिक सम्पदाको जगेर्नाका लागि राष्ट्रिय अभिलेख पुस्तिका तयार गर्नसमेत बजेट व्यवस्था गरिएको छ ।

साहित्य कला, सङ्गीत क्षेत्रको उत्थान तथा विकासका साथै सबै समुदायको परम्परागत सीप र सांस्कृतिक मूल्यमान्यताको संरक्षण तथा सम्वद्र्धन गर्ने कार्यको सञ्चालनका लागि नेपाल प्रज्ञा– प्रतिष्ठान, नेपाल ललितकला प्रज्ञा–प्रतिष्ठान तथा नेपाल सङ्गीत तथा नाट्य प्रज्ञा–प्रतिष्ठानका लागि आवश्यक बजेट व्यवस्था गरिएको बजेटमा उल्लेख गरिएको छ । रासस