एक, दुई, तीन सरकारको ध्यान कोरोना नियन्त्रणमा हुनुपर्छ : गगन थापा (भिडियोसहित)

काठमाडौं । नेपाली कांग्रेसका सांसद गगन थापाले कोरोना संक्रमण बढेकोप्रति चिन्ता व्यक्त गर्दैै सरकारको ध्यानाकर्षण गराएका छन् ।

सोमवार एक भिडियो सन्देश जारी गर्दै नेता थापाले अहिलेको अवस्थामा प्रधानमन्त्रीको एक, दुई तीन सबै ध्यान कोरोना नियन्त्रणतिर हुनुपर्नेमा जोड दिए ।

पूर्व स्वास्थ्यमन्त्री समेत रहेका नेता थापाले संसदको चालू अधिवेशन नभएको भन्दै प्रधानमन्त्री केपी शर्मा ओलीलाई भिडियो सन्देश मार्फत ध्यानाकर्षण गराएका हुन् ।

‘प्रधानमन्त्रीज्यू अहिले पनि कोभिड तपाईंको प्राथमिकतामा परेको छैन । हुन त भन्न सकिएला– अहिले धमाधम निर्णय भएका छन्, निर्देशन दिइएको छ, अब कतिपय ठाउँमा निषेधाज्ञा होला, लकडाउन होला, सरकारले काम गरिरहेको छ । निर्णय गरेर मात्रै हुन्थ्यो भने धेरै पहिला भइसक्थ्यो । हामीलाई चाहिएको निर्णय होइन, नेतृत्व हो । तपाईंको आजको दिनमा प्राथमिकताको एक नम्बर, दुई नम्बर, तीन नम्बर सबै कुरा कोभिडभन्दा अरू हुनु हुँदैन ।’ उनले भने ।