काठमाडौं। युरोपा लिग अन्तर्गत आज बिहान सम्पन्न सेमीफाइनल खेलको पहिलो लेगमा म्यानचेस्टर युनाइटेडले शानदार जित निकालेको छ। आफ्नो घरेलु मैदान ओल्ड ट्राफोर्डमा म्यानचेस्टर युनाइटेडले ए.एस. रोमालाई ६-२ गोलले पराजित गरेको छ।
पहिलो हाफको खेल सकिँदासम्म युनाइटेड २-१ गोलले पछि परेको अवस्था थियो। तर दोस्रो हाफमा उत्कृष्ट कमब्याक गर्दै ५ गोल प्रहार गर्दा युनाइटेडले फाइनलको यात्रा सहज बनाएको हो। खेलको ९औं मिनेटमा युनाइटेडका ब्रुनो फर्नान्डेजबाट शुरू भएको गोलको वर्षा ८६औं मिनेटमा मेसन ग्रिनवुडको गोलपछि अन्त्य भयो।
त्यस्तै अर्को सेमीफाइनल खेलमा इंग्लिश क्लब आर्सनल भिल्लारियलसँग २-१ गोलले पराजित भएको छ। भिल्लारियलको घरेलु मैदानमा सम्पन्न भएको खेलको पहिलो हाफमा नै भिल्लारियलले २ गोलको अग्रता लिएको थियो।
दोस्रो हाफको ५७औं मिनेटमा दोहोरो पहेंलो कार्ड प्राप्त गर्दै आर्सनलका सेबायोसले मैदान छाडेपछि पाहुना टोली १० खेलाडीमा सीमित हुन पुगेको थियो।
अब दुबै सेमिफाइनलको दोस्रो लेग मे ७ मा खेलिने कार्यक्रम रहेको छ।
यो खबर पढेर तपाईलाई कस्तो महसुस भयो ?
प्रतिक्रिया