अन्तर्राष्ट्रिय योग दिवसको अवसरमा आज विभिन्न कार्यक्रमहरू आयोजना भइरहेको छ । कोभिड–१९ को सङ्क्रमण समाप्त नभएको कारण यस पटकको अन्तर्राष्ट्रिय योग दिवसका कार्यक्रमहरू भर्चुअल रूपमै आयोजना भइरहेको छन् ।
संयुक्त राष्ट्र सङ्घले आजको दिन जून २१ लाई अन्तर्राष्ट्रिय योग दिवसको रूपमा मान्यता दिएपछि यसलाई करिब १ सय भन्दा बढी सदस्य राष्ट्रहरूले समर्थन गरिसकेका छन् । योग दिवसलाई अन्तर्राष्ट्रिय मान्यता दिनु पर्छ भनेर संयुक्त राष्ट्र सङ्घमा पहिलो पटक समर्थन गर्ने राष्ट्रमा नेपाल पनि रहेको थियो । यसमा हस्ताक्षर नेपालका तत्कालीन प्रधानमन्त्री सुशील कोइरालाले गर्नु भएको थियो ।
सामूहिक र सार्वजनिक रूपमा गरिने योग कोभिड–१९ को सङ्क्रमण नियन्त्रणमा नआएको कारण गत वर्ष देखि भर्चुअल रूपमै सञ्चालन भइरेका छन् । नेपालमा योगको क्षेत्रमा सक्रिय दर्जनौँ संघसंस्थाहरुले गत वर्ष देखि नै आफ्ना कार्यक्रमहरू भर्चुअल रूपमै सञ्चालन गरिरहेका छन् ।
अन्तर्राष्ट्रिय योग दिवसको अवसर पारेर लोकपथ डटकमले आजबाट ‘घरमै योग’ भन्ने भिडियो शृङ्खला आफ्नो आधिकारिक युट्युब च्यानल ‘लोकपथ टिभी’ मार्फत सञ्चालनमा ल्याएको छ । घरमै सुरक्षित रहेर आफ्नो स्वास्थ्यलाई कसरी स्वस्थ बनाउने भन्ने विषयमा तयार पारिएको यो भिडियो शृङ्खला पतञ्जलि योग समिति नेपालका युवा संयोजक एवं योग गुरु लोकनाथ खनाल मार्फत तयार पारिएको हो । यो भिडियो शृङ्खलामा खनालले योग मार्फत समाधान गरिने विभिन्न रोग र जीवन शैलीलाई कसरी व्यवस्थित गर्ने भन्ने विषयमा विभिन्न जानकारीहरू प्रस्तुत गर्नुहुने छ ।
यो अभियान अन्तर्गतको घरमै योगको पहिलो शृङ्खलामा खनालले बिहान उठ्ने बित्तिकै गर्नु पर्ने नित्यकर्म देखि विभिन्न आसनका कुराहरूलाई प्रस्ट पार्नु भएको छ । यो भिडियोमा राती सुत्दा शिथिल भएको शरीरका अङ्गहरूलाई कसरी लचिलो बनाउने, उठ्ने बित्तिकै के कस्तो खाने, कब्जियतको समस्या भएका व्यक्तिले के गर्ने भन्ने लगायत विभिन्न विषयमा बताउनु भएको छ । यदि तपाईँहरू पनि स्वस्थ जीवनशैली अपनाउन चाहनु हुन्छ र बिहान उठ्ने बित्तिकै कसरी दैनिकी सुरु गर्ने भन्ने विषयमा जानकारी राख्न चाहनुहुन्छ भने यो भिडियो हेर्नुहोला ।
यो खबर पढेर तपाईलाई कस्तो महसुस भयो ?
प्रतिक्रिया