श्रीमतीलाई छुरा हानेर हत्या गरेको अभियोगमा एक युवक पक्राउ

काठमाडौं, १७ चैत । छुरा प्रहार गरी श्रीमतीको हत्या गरेर भाग्दै गरेका एक युवकलाई प्रहरीले पक्राउ गरेको छ ।काठमाडौंको चन्द्रागिरी नगरपालिका नैकापमा शुक्रबार दिउँसो २३ वर्षीया रमिता भनिने नमुना लामाको हत्या गरी फरार भएका उनका श्रीमानलाई २४ घन्टा नबित्दै प्रहरीले पक्राउ गरेको हो ।पक्राउ पर्नेमा २१ वर्षीय प्रकाश तामाङ रहेका छन् । एक महिनादेखि दिदीको घरमा बस्दै आएकी उनलाई शरिरको विभिन्न भागमा छुरा प्रहार गरी हत्या गरेको प्रहरीले जनाएको छ ।प्रहरीका अनुसार नमुना र प्रकाशबीच ६ वर्ष अघि विवाह भएपनि सम्बन्ध राम्रो थिएन । दुबैले एकाअर्कालाई शंका गर्ने र झगडा गर्ने गरेको बताइएको छ ।नमुनाले बाहिरी केटाहरुसँग हिमचिम बढाएको र सोधपुछ गर्दा डिभोर्सको कुरा गर्ने गरेका कारण प्रकाशले २०७३ सालमा विष सेवन समेत गरेका थिए ।प्रकाशले प्रहरीलाई दिएको बयान अनुसार नमुना एक महिनाअघि नैकापस्थित दिदीको घरमा गएकी थिइन् र घरमा बाबु र आमा बिरामी भएको र बच्चा एक्लै पर्दा पनि घरमा आएकी थिइनन् ।शुक्रबार नमुनालाई भेट्न गएका उनीहरुबीच विवाद भएपछि छुरा प्रहार गरी प्रकाश धादिङको गल्छीस्थित ठूलीआमाको घरमा पुगेका थिए । उनलाई प्रहरीले त्यहीबाट पक्राउ गरेको हो ।