फेडेरर दुबई टेनिसको सेमिफाइनलमा प्रवेश

एजेन्सी । स्विस रोजर फेडेरर जारी दुबई टेनिस च्याम्पियनसिपको सेमिफाइनलमा प्रवेश गरेको छ । 

बिहीवार राति सम्पन्न भएको पुरुष एकलतर्फको क्वाटरफाइनल खेलमा फेडेररले हंगेरीका मार्टन फुक्सोभिसलाई २-० को सोझो सेटमा पराजित गर्दै अन्तिम चारमा प्रवेश गरेको हो । उनले फुक्सोभिसलाई ७-६ र ६-४ को सेटमा पराजित गरे ।

उनीहरुबीचको खेल एक घण्टा ५७ मिनेट चलेको थियो । फेडेररले यो प्रतियोगिताको उपाधि जिते उनी व्यक्तिगत सयौं उपाधि जित्ने दोस्रो खेलाडी बन्नेछन् ।

अब फाइनल प्रवेशको लागि फेडेररले क्रोशियाका बर्नो कोरिकको प्रतिस्पर्धा गर्नेछन् ।