मेस्सी नायक बन्दा बार्सिलोनाको सहज जीत

एजेन्सी । उपाधि होडमा रहेको बार्सिलोनाले जारी स्पेनिस ला लिगा फुटबलमा सहज जीत निकालेको छ । 

शनिवार राति सम्पन्न भएको २९ औँ चरणको खेलमा बार्सिलोनाले लिगको १४ औँ स्थानमा रहेको इस्पानियोललाई २-० गोल अन्तरले पराजित ग-र्यो । बार्सिलोनाका लागि कप्तान लियोनेल मेस्सी नायक बने ।

प्रतिस्पर्धात्मक बनेको खेलको पहिलो हाफसम्म दुवै क्लब गोलरहित बराबरीमा रोकिएका थिए । तर, दोस्रो हाफमा सुधारिएको खेल खेलेको बार्सिलोनाका लागि मेस्सीले खेलको ७१ औँ मिनेटमा पहिलो गोल गर्दै क्लबलाई शुरुवाती अग्रता दिलाए ।

त्यस्तै ८९ औँ मिनेटमा उनले दोस्रो गोल गरे । निर्धारित समयसम्म इस्पानियोलले पनि केही गोल गर्ने मौका पाएपनि सदुपयोग भने गर्न सकेन र खेलमा २-० को हार बेहो-र्यो । जीतपछि बार्सिलोनाले १० अंकको अग्रता लिएको छ ।

बार्सिलोनाले २९ खेलबाट ६९ अंक बनाएको छ । लिगको दोस्रो स्थानमा रहेको एथ्लेटिको म्याड्रिडको ५९ अंक छ । 

शनिवार राति नै भएको अर्को खेलमा एथ्लेटिको म्याड्रिडले अलोभेसलाई ४-० गोल अन्तरले, सेल्टा डि भिगोले भिल्लारियललाई ३-२ गोल अन्तरले तथा लेगानेसले गेटाफेलाई २-० गोल अन्तरले पराजित ग-र्यो ।