थप एक जनामा कोरोना पुष्टि, नेपालमा ६० जना पुगे संक्रमित

काठमाडौं । नेपालमा थप एक जनामा कोरोना संक्रमित भेटिएका छन् ।

आइतवार भेटिएका संक्रमित वीरगञ्ज महानगरपालिका वडा नम्बर ३ छपकैयाका ३६ वर्षीय पुरुष रहेको स्वास्थ्य तथा जनसंख्या मन्त्रालयको स्रोतले जनाएको छ । योसँगै नेपालमा कोरोना भाइरस संक्रमितको संख्या ६० पुगेको छ

शुक्रवार उनको स्वाब संकलन गरिएको थियो । उनी स्वयंले शंका लागेपछि पीसीआर परीक्षण गराइदिन त्यहाँका स्थानीय प्रशासनले बताएका थिए ।

संक्रमण पुष्टि भएपछि उनलाई नारायणी अस्पताल ल्याइ उपचार गरिरहेको मन्त्रालयको स्रोतले जनाएको छ ।

हालसम्म नेपालमा कोरोना संक्रमितको संख्या ६० पुगेको छ । भने उनीहरुमध्ये १६ जना उपचारपछि निको भएर घर फर्किएका छन् । संक्रमित मध्ये ५० जना पुरुष तथा १० जना महिला रहेको स्वास्थ तथा जनसंख्या मन्त्रालयले जनाएको छ । त्यस्तै हालसम्म नेपालमा ३ सय २१ जना रेड जोनमा परेका छन् ।