खहरे खोला, उर्लेर आउँछ ।
तहसनहस पार्छ ।
ठूलो खैलाबैला मच्चाउँछ ।
थोरै विनाश पनि पुर्याउँछ ।
अनि केही क्षणमै स्याप्पै सुकेर जान्छ ।
ठीक त्यस्तै भएका छन् नेपाली संगीतकर्मीहरु ।
गीत सुपरहिट बनाउन अनेक फण्डाहरु अपनाउँछन्, गीतले बजार तताउँछ पनि तर छोटो समयपछि गीत गायब र गीत बनाउने मान्छे पनि ।
अहिले नेपाली सांगीतिक क्षेत्रलाई हेर्ने हो भने गुणस्तरीय संगीतका स्रष्टा हातका औंलामै गन्न सकिन्छ ।
सिधा भाषामा भन्दा संगीतलाई बुझेर, संगीतमै भिजेर आफ्नो जीवन संगीतमा समर्पित गर्ने संगीतकारहरु लोप हुन लागेको अवस्था देखिन्छ ।
संगीत स्रष्टाहरुको त्यही सिमित परिधीभित्र पर्ने एक होनहार प्रतिभा हुन्, बिबि अनुरागी ।
हेर्दा गम्भीर ।
केही सोचिरहे जस्तो देखिने ।
तानाबाना बुनिरहेजस्तो लाग्ने व्यक्तित्व ।
कम बोल्ने । बोल्दा सोचेर मात्रै बोल्ने ।
अनुरागीले आफ्नो जीवनको दुई दशक भन्दा बढी समय संगीतमा समर्पित गरिसकेका छन् ।
थुप्रै गीतमा उनले संगीत मात्र होइन आवाज समेत भरिसकेका छन् ।
‘जीवनमा सोच्दै नसोचेको सुख पाएँ, सोच्दै नसोचेको दुःख पनि पाएँ ।’ आफ्नो २४ वर्ष लामो सांगीतिक यात्रा स्मरण गर्दैगर्दा अनुरागी केही भावुक भए ।
‘तर संगीतले सबै दुःख बिर्साइदियो । संगीतमा खै कस्तो शक्ति हुँदो रहेछ ।’ दङ्ग पर्दै उनले थपे ।
केही समयदेखि मिडियामा त्यत्ति देखा नपर्ने अनुरागी अहिले आफ्नै म्युजिक स्टुडियोमा व्यस्त छन् ।
उनका स्टुडियोमा दजर्नौं गीतहरु रेकर्ड भइरहन्छन् ।
आफ्नै स्टुडियो भएकाले पनि उनी नयाँ पुराना दजर्नौं संगीतकर्मीहरुसँग चियाको चुस्की साट्न पाउँछन् ।
संगीत क्षेत्रमा लागेका नयाँनयाँ व्यक्तिहरुसँग संगत गर्ने क्रममा उनले वर्तमान समयको नेपाली संगीतको ट्रेन्ड लाई पनि राम्रोसँग बुझ्ने मौका पाएका छन् ।
केही सोचे भावुक भए र थपे, ‘पहिले र अहिलेको संगीतमा आकाश जमिनको भिन्नता छ ।’
जब उनले उडेर जून छुन्छु भन्थेँ भन्ने गीतमा संगीत भरे ।
तब उनले वा… वा.. वा… भनेर बेपत्ता हुने स्रोता वा दर्शक भन्दापनि आत्मिय शुभचिन्तक कमाए ।
अनुरागीको भाषामा ती शुभचिन्तक उनले कमाएका सम्पत्ति हुन् । अनमोल सम्पत्ति ।
लगत्तै ‘जहाँ तिमी त्यहाँ म हुन नपाउँदा’ आएपछि बजार मज्जैले तात्यो । गीत सुनेर धेरै आफ्नो ‘फ्ल्यास ब्याक’ मा पुगे ।
प्रतिक्रिया आयो, यो गीतले मेरो कथा भन्यो । धेरैले उनलाई धन्यवाद भन्न भ्याए ।
त्यसपछि आएको ‘तिम्रो झल्को आउँछ मेरो परदेशी’ पनि कम्ती रुचाईएन ।
त्यसैले त अहिले पनि यी गीतहरु सुनिदैनन् मात्रै । गुनगुनिदैनन् मात्रै ।
वेपर्वाह महसुस गरिन्छन् ।
***
तर अहिले समय फेरिएको छ । अझ भनौँ समयले गीत, संगीत, स्रष्टा, सर्जकलाई सोच्न बाध्य बनाएको छ ।
त्यसको एउटै कारण छ, आजकल नेपाली सांगीतिक क्षेत्रमा सदावहार गीतहरु कमै बनिन्छन् ।
क्षणिक रुपमा बजार तताउनलाई सेल्फी, फेसबुक, सेक्स जस्ता शब्दहरु अटाईनहटाई गीतमा घुसायो ।
अनि त्यसैलाई विषय बनाएर गीत निर्माण गर्यो । चर्चित कलाकारलाई भिडियोमा उत्तेजक रुपमा प्रस्तुत ग¥यो । गीत सुपरहिट ।
बिहे, पार्टीमा केही समयसम्म ती गीतहरु गुञ्जिन्छन् पनि तर, कहिले सम्म ?
यस्तो विकृतिप्रति अनुरागी गहिरो चिन्ता व्यक्त गर्छन् ।
नेपाली सांगीतिक क्षेत्रमा पैसाकै भरमा गायक हुनेहरुको झुण्ड बनेको छ । यो कुरामा अनुरागी सहमत छन् ।
****
‘आवाजलाई साधना र अभ्यासले भन्दा पनि प्रविधि प्रयोग गरेर राम्रो बनाउँछन् आजकल । संगीतको स थाहा नहुनेहरु आफूलाई गायक भन्दै गर्व गर्छन् ।’ उनले लोकपथसँग गुनासो पोखे ।
‘गीत गुनगुनाउन आउने बित्तिकै आफूलाई नामूद गायक भन्नेहरुलाई के भनौँ र खोई ?’ उनले निधार खुम्चाउँदै भने ।
***
पैसा जोगाउने फण्डा हो कि सांगीतिक क्षेत्रमा जनशक्तिको अभाव भएर हो अथवा संगीतकारहरु आफैं मल्टिट्यालेन्टेड भएको नि हुन सक्छ ।
खैर जे सुकै होस् तर आफ्नो गीतमा आफैं अभिनय गर्ने ट्रेन्ड ह्वात्तै बढेको देखिन्छ ।
बिबि अनुरागी पनि यो ट्रेन्डदेखि अछुतो रहन सकेनन् । पछिल्लो समयका उनका केही गीतहरुमा उनले आफैं अभिनय गरेको पाइन्छ ।
संगीतकार आफैं, गायक पनि आफैं अनि अभिनय समेत आफ्नै ।
किन ? हामीले प्रश्न तेर्सायौं ।
उनी भन्छन् ‘गीतको भिडियो जुगौंजुग जीवित रहन्छ । सदावहार रहन्छ । कुनै दिन म बुढो भइहाल्छु तर भिडियोमा त अहिलेकै बिबि अनुरागी कैद भएको छ नि !’
उनी मज्जैले हाँसे ।
***
यो खबर पढेर तपाईलाई कस्तो महसुस भयो ?
प्रतिक्रिया