काठमाडौं । सशस्त्र प्रहरीले बडादशैँको अवसरमा पोखरामा निःशुल्क बस सेवा सञ्चालन गरेको छ ।
पोखरामा रहेको सशस्त्र प्रहरीको एउटा बस दशैँको विदा अवधिभर यात्रुहरुको सहजतालाई ध्यानमा राखेर सञ्चालन गरेको हो ।
सशस्त्र प्रहरीले पोखरामा आज (मंगलवार) बाट बडादशैँको विदा अवधिभर विरामीलाई सेवा दिन एउटा एम्बुलेन्स समेत निःशुल्क सञ्चालन गरेको छ ।
बडादशैँको बेला सार्वजनिक यातायातका साधनहरु न्यून रुपमा चल्ने भएकोले सर्वसाधारणको आवतजावतमा सुविधा पु¥याउने उद्देश्यले सशस्त्र प्रहरीद्वारा निःशुल्क बस सञ्चालन गरिएको हो ।
उक्त बस सेवा पोखरामा अम्मरसिंह चोकबाट छुटेर पृथ्वीचोक, विरौटा, डेविडफल्स, छोरेपाटन, लेकसाईड, हल्लनचोक, सृजनाचोक, न्यूरोड, चिप्लेढुंगा, महेन्द्रपूलबाट बगरहुँदै फेरी महेन्द्रपूल पुगेर गण्डकी अञ्चल अस्पताल हुँदै अम्मरसिंह चोकमै पुग्नेछ ।
यसैगरी सशस्त्र प्रहरीले विरामीलाई सेवा प्रदान गर्न स्ट्याण्डवाई राखेको उक्त एम्बुलेन्सले यीनै ठाउँहरुबाट विरामीलाई पोखरास्थित अस्पताल पु¥याउन सेवा प्रदान गर्नेछ ।
पोखरामा बिहान ८ बजेदेखि बेलुका ६ बजे सम्म बस सेवा सञ्चालन हुनेछ ।
त्यस्तै मंगलवारदेखि काठमाडौं उपत्यकामा सशस्त्र प्रहरीको ४ वटा बस निःशुल्क रुपमा सञ्चालन भएको छ ।
काठमाडौं उपत्यकाभित्र सशस्त्र प्रहरीको निःशुल्क बस सेवाको एउटा रुट कलंकीबाट छुटेर कालिमाटी, त्रिपुरेश्वर, माईतिघर, वानेश्वर, कोटेश्वर, ठिमी हुँदै सूर्यविनायक पुगी पुनः सोही रुटबाट कलंकीसम्म फिर्ता हुनेछ ।
यसैगरी अर्को रुटमा लगनखेल, जावलाखेल, पुल्चोक, त्रिपुरेश्वर, जमल, लैनचौर, नारायणगोपालचोक, बाँसबारीहुँदै बुढानिलकण्ठसम्म पुग्नेछ भने सोही रुट हुँदै लगनखेलसम्म पुग्नेछ ।
यसैगरी सशस्त्र प्रहरी बलको अर्को बस स्वयम्भु हल्चोकबाट छुटेर कलंकीहुँदै बल्खु, सातदोबाटो, कोटेश्वर, गौशाला, चावहिल, सामाखुशी, बालाजुहुँदै चक्रपथ परिक्रमा गर्नेछ भने अर्को बस स्वयम्भु हल्चोकबाट छुटेर बालाजुहुँदै सामाखुशी, चावहिल, गौशाला, कोटेश्वर, सातदोबाटो, बल्खु, कलंकी भएर चक्रपथ परिक्रमा गर्नेछ ।
सशस्त्र प्रहरी बल नेपालले काठमाडौं उपत्यकाभित्र संचालन गर्ने सो निःशुल्क बस बडादशैंको विदा अवधिभर बिहान ८ बजेदेखि बेलुका ६ बजे सम्म सञ्चालन हुनेछ ।
सशस्त्र प्रहरी बल नेपालले बडादशैँको अवसरमा यात्रुहरुलाई सहजता होस भन्ने अभिप्रायले सशस्त्र प्रहरी बल नेपालसँग रहेका ती बसहरु सञ्चालनमा ल्याइएको हो ।
यो खबर पढेर तपाईलाई कस्तो महसुस भयो ?
प्रतिक्रिया