काठमाडौं । राष्ट्रिय पुनर्निर्माण प्राधिकरणले निजी आवास पुनर्निर्माणमा ८० प्रतिशत उपलब्धि हासिल भएको जनाएको छ ।
अनुदान सम्झौता गरेका ७ लाख ६२ हजार ३ सय ७ घरपरिवार मध्ये ६ लाख १२ हजार ९ सय ३५ घर पुनर्निर्माणको प्रक्रियामा रहेको प्राधिकरणले जनाएको छ । यस्तै ५० प्रतिशत अर्थात ३ लाख ८२ हजार २ सय ७७ परिवारले घर बनाइसकेको राष्ट्रिय पुनर्निर्माण प्राधिकरणका प्रमुख कार्यकारी अधिकृत (सीईओ) सुशील ज्ञवालीले मंगलबार आयोजित पत्रकार सम्मेलनमा जानकारी दिए । उनका अनुसार ३० प्रतिशत अर्थात २ लाख ३० हजार ५ सय ५८ परिवार निजी आवास पुनर्निर्माणको क्रममा रहेका छन् ।
जोखिममा परेका वर्ग र असुरक्षित स्थानमा रहेका परिवारलाई सुरक्षित जग्गा उपलब्ध गराउने व्यवस्था समेत प्राधिकरणले मिलाएको भन्दै ज्ञवालीले भूमिहीन, स्ववासीलगायतको समस्या पनि समाधान गर्ने क्रममा रहेको बताएका छन् ।
यस्तै भूकम्पबाट ७ हजार ५ सय ५३ विद्यालय क्षति भएकोमा निर्माण सम्पन्न र निर्माणाधीन गरी ८३ प्रतिशत प्रगति भएको ज्ञवालीले जानकारी दिए । यस्तै स्वास्थ्य संस्थातर्फ ६६ प्रतिशत, पुरातात्विक महत्वको सम्पदातर्फ ५९ प्रतिशत, सुरक्षा निकायका भवनहरु ५६ प्रतिशत पुनर्निर्माण सम्पन्न भएको छ । प्राधिकरणले पुनर्निर्माण र पुनःस्थापनाको कार्यहरु सम्पन्न गर्न सबैभन्दा ठूलो चुनौती वित्तीय व्यवस्थापन देखिएको जनाएको छ ।
पुनर्निर्माण र पुनःस्थापनाको पञ्चवर्षीय योजनामा समग्र लागत ९३८ अर्ब आँकलन गरिएकोमा आर्थिक वर्ष ०७४–०७५ मा कूल १८६ अर्ब रकम खर्च भएको छ । यस्तै चालू आर्थिक वर्षमा जम्मा १ सय २३ अर्ब खर्च गर्ने परिमार्जित लक्ष्य लिइएको सीईओ ज्ञवालीले जानकारी दिए ।
प्राधिकरणले सरकारको नियमित कार्यक्रम, निजी क्षेत्र र गैरसरकारी क्षेत्रबाट करिब २ सय अर्ब परिचालन हुने अपेक्षा गरेको छ । जसअनुसार पुनर्निर्माण कार्य सम्पन्न गर्न करिब ४ खर्ब २९ अर्ब थप रकम आवश्यक पर्ने प्राधिकरणले जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया