राजपाले टुंगो लगायो महाधिवेशनको नयाँ मिति

काठमाडौं– राजपाको नयाँ महाधिवेशनको मिति तय भएको छ ।  राजपाको बैशाख ८ देखि सुरु भएर शुक्रबार सम्पन्न पदाधिकारी समितिको बैठकले महाधिवेशनको नयाँ मिति टुंगो लगाएको हो ।

जसअनुसार आगामी कात्तिक २८, २९ र ३० गते महाधिवेशन सम्पन्न गर्ने निर्णय गरिएको छ । यसअघि बैशाख पहिलो साता महाधिवेशनको मिति तोकेपनि हुन सकेको थिएन ।

बैठकले महन्थ ठाकुरको संयोजकत्वमा सबै केन्द्रीय समितिका सदस्यहरु रहनेगरी महाधिवेशन मूल आयोजक समिति समेत गठन गरिएको छ ।

यस्तै लक्ष्मणलाल कर्णको संयोजकत्वमा सर्वेन्द्रलाल शुक्ल, मानध्वज ब्लोन तामाङ, मालामति राना थारु, राजकुमार थापा, केशव झा, रामलाल सुतिहार, हरेन्द्र यादव र अकवाल अहमद सदस्य रहेको मस्यौदा समिति पनि बैठकले गठन गरेको छ ।