जुनियर कराँते शुक्रवारदेखि शुरु हुने

काठमाडौं । नेपाल सितोरियो कराँते संघ, ठमेल शाखा डोजोको आयोजनामा पाँचौं अन्तर्राष्ट्रिय जुनियर कराँते प्रतियोगिता शुक्रवारदेखि हुने भएको छ ।

प्रतियोगितामा नेपालबाट ४ सय, भारतबाट १ सय ८० र बंगलादेशबाट १० गरी ५ सय ९० खेलाडीको सहभागिता रहने आयोजक ठमेल शाखा डोजोका प्रमुख सन्तोष श्रेष्ठले जनाएका छन् । जम्मा ४० स्पर्धामा भिडन्त हुनेछ ।

दुईदिने प्रतियोगिताका खेलहरु लैनचौरस्थित राष्ट्रिय टेबलटेनिस प्रशिक्षण केन्द्रको हलमा हुनेछ । प्रतियोगिताका दौरान अन्तर्राष्ट्रिय पदक विजेतालाई सम्मान पनि गरिने आयोजकले जनाएको छ ।