सर्लाहीमा दिनदहाडै गोली प्रहार, एक जना घाइते

काठमाडौं । सर्लाहीमा दिनदहाडै अज्ञात समूहबाट गोली प्रहार हुँदा एक जना घाइते भएका छन् । गोली प्रहारबाट लालबन्दी नगरपालिका–१ नवलपुरका ३० वर्षीय जयनाथ महतो घाइते भएका हुन् ।

मोटरसाइकलमा आएको दुई जनाको टोलीले मध्यान्ह करिब १२ बजे काम गरिरहेको ठाउँमा महतोमाथि गोली प्रहार गरेको प्रहरीले जनाएको छ ।

जिल्ला प्रहरी कार्यालय सर्लाहीका अनुसार मन्दिर निर्माणमा मजदुरी गरिरहेका महतोमाथि गोली हानी उक्त समूह मोटरसाइकलमै जंगलतर्फ भागेको छ ।

गोली प्रहारबाट महतोको दाहिने हातमा चोट लागेको छ । महतोको स्थानीय अस्पतालमा उपचार भइरहेको प्रहरीले जनाएको छ ।

हालसम्म गोली हान्नुको कारण र समुहबारे केही नखुलेको जिल्ला प्रहरी कार्यालय सर्लाहीले जनाएको छ ।