अफगानिस्तान विरुद्ध नेपालको शानदार जित

काठमाडौं । पाहुना टोली अफगानिस्तान विरुद्धको दोस्रो मैत्रीपूर्ण भलिबलमा नेपालले शानदार जित निकालेको छ । बिहिबार भएको दोस्रो खेलमा नेपालले अफगानिस्तानलाई ३–२ को सेटमा पराजित गरेको हो । लगनखेलस्थित सैनिक शारीरिक तालिम तथा खेलकुद केन्द्रमा भएको खेलमा नेपालले अफगानिस्तानमाथि उत्कृष्ट पुनरागमन गर्दै जित निकाल्न सफल भयो ।

निकै प्रतिस्पर्धात्मक बनेको खेलमा नेपालले पहिलो सेट २५–२२ र दोस्रो सेट २५–१५ ले गुमाएको थियो । तर, नेपालले त्यसपछिको तीन सेटमा लगातार जित निकाल्यो । तेस्रो सेट २६–२४ र चौंथो सेट २६–२४ ले जित्दै खेल २–२ को बराबरीमा ल्याएको नेपालले अन्तिम सेटमा १५–१२ को सेटमा जित निकाल्दै अफगानिस्तानलाई निराश बनाएको हो ।