चिनियाँ राष्ट्रपति सी नेपाल भ्रमणमा आउने

काठमाडौं। चिनियाँ राष्ट्रपति सी जिनफिङ नेपाल भ्रमणमा आउन सकारात्मक भएसँगै दुवै मुलुक भ्रमणको तयारीमा जुटेका छन्। आगामी असोज अन्तिम साता सी नेपाल आउने भएसँगै भ्रमणको तयारी अघि बढाइएको हो।

राष्ट्रपति सी आगामी असोज अन्तिम साता भारतको तमिलनाडुस्थित ममल्लापुर भ्रमणमा जाने र सोही क्रममा काठमाडौं आउने बताइएको छ। सी नेपाल हुँदै भारत जाने वा भारत भ्रमण सकेर नेपाल आउने भन्नेबारे अझै टुङ्गो नलागे पनि उनको भ्रमण हुने बलियो संकेत आएसँगै यसबारेको तयारी अघि बढाइएको गृह मन्त्रालयले जनाएको छ।

सीको भ्रमणको सुरक्षा भारतीय प्रधानमन्त्री नरेन्द्र मोदीको नेपाल भ्रमणका क्रममा नेपालले प्रदान गरेको सुरक्षाभन्दा कमजोर हुन नहुने चिनियाँ पक्षको जोड रहेको सो मन्त्रालयका एक अधिकारीले बताए। ती अधिकारीका अनुसार गत असार र साउनमा नेपाल आएको चिनियाँ सुरक्षा टोलीले मोदीसरह र अझ उपल्लोस्तरको सुरक्षा सुनिश्चिताको अडान दोहोर्याएको हो। नेपाल समाचारपत्रमा खबर छ ।