‘क्यान’को चुनावी साधारणसभा काठमाडौंमा सुरु

काठमाडौं । नेपाली क्रिकेटको सर्वोच्च निकाय नेपाल क्रिकेट संघ (क्यान) को चुनावी साधारणसभा काठमाडौंमा सुरु भएको छ ।

अन्तर्राष्ट्रिय क्रिकेट काउन्सिल (आईसीसी) बाट साढे तीन वर्षदेखी निलम्बनमा परेको नेपाल क्रिकेट संघ आईसीसीको रोहबरमा सुरु भएको यो साधारण सभाले नयाँ नेतृत्व पनि चुन्नेछ । नेतृत्वको लागि शनिबार निर्वाचन हुँदै छ । आज साधारण सभा र भोली हुने निर्वाचनले क्यानलाई नयाँ नेतृत्व दिनेछ । १७ सदस्यीय नयाँ नेतृत्वका लागि ५९ जनाले मतदान गर्नेछन् । जसमा ३९ जिल्लाका प्रतिनिधि र प्रदेशका २० जना मतदाताले चुनावमा सहभागिता जनाउने छन ।

नयाँ नेतृत्वका लागि दुई पूर्वअध्यक्ष विनयराज पाण्डे र चतुरबहादुर चन्द चुनावी मैदानमा उठ्ने पक्का भएको छ । पाण्डे र चन्द दुवै पक्षको चुनावी एजेण्डा क्यानमाथिको निलम्बन फुकुवामा नै केन्द्रित छ । यस अघि सरकारी हस्तक्षेप भएको भन्दै आइसीसीले क्यानलाई निलम्बन गरेको थियो । तर नेपाली खेलाडी आइसीसीकै अधिनमा रहेर प्रतियोगितामा सहभागिता जनाउँदै आइरहेका छन् । यस अघि निर्वाचित क्यान, राष्ट्रिय खेलकुद परिषद तथा अन्य सबै सरोकारवालाको सहमतिमा आइसीसीद्वारा गठित स्वतन्त्र समूहले असोज ३ र ४ गतेका लागि आह्वान गरेको साधारणसभा राखेपको असहमतिका कारण १० र ११ गतेका लागि सारिएको थियो ।

यस्तै असोज २६ मा आईसीसीको बोर्ड बैठक बस्दैछ । सो बैठकमा नेपालमाथि लगाइएको निलम्बन फुकुवा हुने अपेक्षा लिइएको छ ।