लाङटाङ क्षेत्रमा पर्यटक बढ्न थाले

काठमाडौं । लाङटाङ, गोसाइँकुण्ड र तामाङ सम्पदा पदमार्गमा भ्रमण गर्ने पर्यटकको सङ्ख्या बढ्न थालेको छ ।लाङटाङ राष्ट्रिय निकुञ्जका वन प्राविधिक रमेश बस्नेतका अनुसार चालू वर्षा ऋतुको दुई महीनामा पर्यटकहरू न्यून सङ्ख्यामा आएपनि शरद ऋतुमा भने वर्षाको कमी हुनाका साथै र कुहिरो हटेर अग्ला हिमालका सौन्दर्य अवलोकनका लागि पदयात्रा गर्न आन्तरिक एवं वाह्य पर्यटकको आगमन बढ्दै गएको हो ।

गत साउन, भदौ र असोज महीनामा छ हजार ६०० आन्तरिक र दुई हजार ५१४ विदेशी पर्यटक निकुञ्जभित्र प्रवेश गरिसकेका छन् । तीमध्ये ४३ सार्क राष्ट्रका भएको निकुञ्जका प्राविधिक बस्नेतले बताउनुभयो ।हिमाली दृश्य अवलोकनका लागि आउने आन्तरिक एवं वाह्य पर्यटकले पवित्र तीर्थ गोसाइँकुण्ड, लाङटाङ क्षेत्र, तामाङ सम्पदा पदमार्गअन्तर्गत गतलाङ, नाकथलीलगायत क्षेत्रको भ्रमण गर्ने गरेको यहाँका पर्यटन व्यवसायीले जनाएका छन् ।

आन्तरिक पर्यटकका लागि प्रतिव्यक्ति १००, सार्क मुलुकका लागि  एक हजार ५०० र अन्य वाह्य मुलुकका पर्यटकका लागि तीन हजार प्रवेश शुल्क तोकिएको र तीर्थका लागि गोसाइँकुण्डको विशेष मेला अवधिभर नेपाली यात्रुका लागि मात्र शुल्क नलाग्ने व्यवस्था मिलाइएको निकुञ्जले जनाएको छ । विगत तीन महिनामा पर्यटक शुल्कबाट सङ्कलित ८१ लाख ३७ हजार ५०० राजश्व दाखिला भइसकेको बताइएको छ । राजधानी काठमाडौँदेखि छोटो दूरी र प्राकृतिक स्थलको जिल्ला भएकाले यहाँ भ्रमणमा आएका पर्यटकले सात दिनमा पूरै गन्तव्यस्थल घुमिसक्ने, अर्कोतर्फ उच्च भागका चन्दनवारी, लौरीविनायक, गोसाइँकुण्डमा र लाङटाङ क्याङजेन, नाकथलीसमेतका स्थानमा खानेबस्ने राम्रो सुविधा भएको लाङटाङका पर्यटन व्यवसायी तेम्वा लामा बताउनुहुन्छ ।

हिजोआज जमीनमा कुहिरो नउठ्ने, हिमाल दिनभर खुल्ला हुने र अग्लो स्थानमा सेताम्बे हिउँ समथर र हरियाली पाखा, विभिन्न प्रजातिका चरा उडिरहने अस्मिज बाँदरलगायत अन्य जनावर हेर्न पाइन्छ । यात्रा गर्दा थकाइ र भोक लागेमा ठाउँठाउँमा खान र बस्न होटल पाइने, धुन्चेतर्फ र काठमाडौँको सुन्दरीजलदेखि हेलम्बु हुँदै दुवै तर्फबाट गोसाइँकुण्ड पुग्न सकिने भएका कारण रसुवाको हिमाली पदयात्रा रोमञ्चकारी बन्दै गएको पर्टकहरूले बताएका छन् । सुन्दरीजलदेखि गोसाइँकुण्ड यात्रा गर्ने पर्यटकले लौरीविनायक, चोलाङपाटी, ठूलोस्याफ्रु, लामा होटल हँुदै लाङटाङ, शेर्पा गाउँ वृद्धिम, थुमन, नाकथली, गतलाङ पर्वतीकुण्ड, गोल्जुङ, स्याफ्रुबेँसी पुगेर बसबाट काठमाडौँ फर्कन सक्ने छन् ।