काठमाडौं । प्रदेश नं ५ का निवर्तमान प्रदेश प्रमुख उमाकान्त झाले प्रदेश प्रमुख पदमुक्त गर्ने सरकारको निर्णय स्वाभाविक भएको बताउनुभएको छ । सरकारले गर्ने कुनै पनि नियुक्ति निश्चित काम र समयको लागि हुने भएकाले यो प्रक्रियालाई आफूले सामान्य रूपमा लिएको हुँदा विचलित हुनुनपर्ने बताउनुभयो ।
प्रदेश प्रमुख कार्यालयमा आज आयोजित बिदाइ कार्यक्रममा निवर्तमान प्रदेश प्रमुख झाले आफू निजामती कर्मचारीबाट आएकाले पनि यस्तो प्रक्रियामा अभ्यस्त रहेको बताउनुभयो । पहिलो प्रदेश प्रमुख भएर आएको २२ महिनाको कार्यकाल अत्यन्त सफल रहेको भन्दै उहाँले प्रदेश प्रमुख भएर आफूले ‘के गर्न सकेँ के गर्न सकिनँ’ भन्ने कुरा समयले मूल्याङ्कन गर्ने बताउनुभयो । “म आउँदा जुन कामको लागि उत्साह, उमङ्ग र जिम्मेवारी थियो बिदाइ भएर जाँदा पनि त्यो जिम्मेवारी पूरा गर्न सकेको कारण त्यही खुशी लिएर जाँदैछु”, उहाँले भन्नुभयो ।
उहाँले प्रदेश सरकारको स्थापनासँगै संविधान र सङ्घीयता कार्यान्वयनमा आफूले गरेका काम सबैका सामु छर्लङ्ग रहेको उल्लेख गर्दै ती कामलाई उजागर गर्न सञ्चार माध्यमलाई आग्रहसमेत गर्नुभयो । आफूले प्रदेश सरकारका बहुआयामिक सम्पूर्ण काम नजिकबाट हेर्ने र आफ्नो भूमिका निर्वाह गर्ने मौका पाएको उल्लेख गर्दै उहाँले प्रदेश सरकारले पनि कानून निर्माणदेखि प्रदेशका योजना निर्माणमा राम्रोसँग काम गरेको बताउनुभयो ।
कार्यक्रममा आन्तरिक मामिला तथा कानूनमन्त्री कुलप्रसाद केसीले निवर्तमान प्रदेश प्रमुख झालाई मायाको चिनो प्रदान गर्नुभएको थियो । विसं २०३५ मा इञ्जिनीयरको रूपमा निजामती कर्मचारी सेवामा प्रवेश गरेका झालाई नेपाली काङ्ग्रेसका सभापति शेरबहादुर देउवा नेतृत्वको पछिल्लो सरकारले २०७४ साल माघ ३ गते प्रदेश ५ को पहिलो प्रदेश प्रमुखको रूपमा नियुक्ति गरेको थियो ।
यो खबर पढेर तपाईलाई कस्तो महसुस भयो ?
प्रतिक्रिया