काठमाडौं । सरकारले राष्ट्रिय महोत्सवकै रुपमा मनाउन लागेको ‘नेपाल भ्रमण वर्ष २०२०’ आज देखि शुरु भएको छ । अर्थात्, सन् २०२० जनवरी १ तारिखका दिन (पुस १६ गते) काठमाडौँको दशरथ रङ्गशालामा विशेष समारोहसहित भ्रमण वर्षको औपचारिक शुभारम्भ गरिँदैछ ।
दशरथ रंगशालामा हुने विशेष कार्यक्रमको उद्घाटन राष्ट्रपति विद्यादेवी भण्डारीले गर्दैछिन्।
उद्घाटन अघि विभिन्न स्थानबाट र्याली निकालेर उद्घाटनस्थल रंगशालासम्म जाने पर्यटन मन्त्रालयले जानकारी दिएको छ। उद्घाटन कार्यक्रममा सहभागी हुन विश्वका विभिन्न देशबाट पर्यटनमन्त्री नेपाल आइसकेका छन्।
उद्घाटनपूर्व निस्किने र्याली र राष्ट्रपतिलगायतको सवारीका कारण बुधबार काठमाडौं उपत्यकाको आवागमन प्रभावित हुने महानगरीय ट्राफिक प्रहरी महाशाखाले जनाएको छ। दिउँसोको समयमा ठमेलबाट र्यालि निस्केर रंगशालासम्म जाने भएकाले वैकल्पिक रुट प्रयोग गर्न महानगरीय ट्राफिक प्रहरी महाशाखाले अनुरोध गरेको छ।
ट्राफिक प्रहरी महाशाखाका अनुसार थापाथली, त्रिपुरेश्वर, कालिमाटी, शहिद गेट, जमल, केशरमहल क्षेत्रमा सवारी आवागमन प्रभावित हुनेछ। महाशाखाले अत्यावश्यक सवारी साधनबाहेक अन्य सवारी साधन नचलाई वैकल्पिक रुट प्रयोग गर्न आग्रह गरेको छ। कार्यक्रममा सहभागी हुन आउने सर्वसाधारणको लागि काठमाण्डौ मल अगाडी टुँडिखेलमा पार्किङ स्थलको व्यवस्था गरिएको छ।
यो खबर पढेर तपाईलाई कस्तो महसुस भयो ?
प्रतिक्रिया