अब कुनै आयोजना शुन्यमा रहन सक्दैन : मन्त्री नेम्बाङ

काठमाडौं । भौतिक पूर्वाधार तथा यातायातमन्त्री बसन्तकुमार नेम्बाङले सार्वजनिक खरिद नियमावली नवौँ संशोधन आइसकेपछि कुनै पनि आयोजनाहरु शुन्यमा बस्न नसक्ने बताएका छन् ।

आज सडक बोर्ड नेपालले आयोजना गरेको रणनीतिक सडक मर्मत संभार सम्बन्धी बार्षिक समिक्षा एवंम प्रगति गोष्ठिलाई सम्बोधन गर्दै उनले यस्तो बताएका हुन् ।

मन्त्री नेम्वाङले भने ‘सार्वजनिक खरिद नियमावली नवौँ संशोधनले साथीहरुलाई निक्कै गम्भिर बनाएको हुनसक्छ । हुनु पर्दछ भन्ने अनुमान गर्छु । हामीले कामका सबै क्षेत्रलाई हेर्नु पर्दछ । सार्वजनिक खरिद प्रक्रियालाई पछ्याउनै पर्छ ।’ उनले गोष्ठिमा सहभागी सडक विभाग, सडक बोर्ड नेपाल, संघीय सडक सुपरिवेक्षण तथा अनुगमन कार्यालय र विभिन्न डिभिजन प्रमुखहरुलाई लक्षित गर्दै त्यस्तो बताएका हुन् ।

उनले भने–‘राज्यले कानून बनाएरै निर्माण व्यवसायीहरुलाई मौका दिएकाले अब कुनै पनि ठेक्काहरुले लापरवाही गरे मान्य हुँदैन् ।’

मन्त्री नेम्बाङले रणनीतिक सडकहरुको मर्मत संभार गर्ने कार्य सानो भएपनि त्यसको असर र प्रभाव व्यापक रहेको बताए । उनले भने ‘सडक मर्मत, सडक सुरक्षा, सडक दुर्घटनासंग जोडिएका हु्न्छन् । जुन काम सानो भएता पनि महत्वपूर्ण काम हो, क्षेत्र हो । काम हेर्दा सानो देखिन्छ तर त्यसले पार्ने दुरगामी प्रभाव अत्यन्तै महत्वपूर्ण हुन्छ ।’

उनले मुलुकभरका सबै उपभोक्तादेखि नीति निर्माण तहमा रहेका सबैले सडकको अवस्थालाई गम्भिर रुपमा नियाली रहेकाले सडकको निर्माण, मर्मत संभारसंग सम्बन्धित जिम्मेवारी बहन गर्नेले यसलाई सानो कामको रुपमा नलिन आग्रह गरे । उनले सडक मर्मत संभार सेकेण्डरी काम हुन नसक्ने उल्लेख गरे ।

उनले भने ‘केहि अघिसम्म सडकका खाल्डाखुल्डी नपुरिएका कारण सडक दुर्घटना बढ्यो, मानिसहरुको मृत्यु भयो, घाइते भएका कारण जनजिवन अस्तव्यस्त भयो भन्ने निक्कै चासो रह्यो । त्यसो भएका हुनाले यो क्षेत्र प्राथमिकतामा रहनु पर्छ । नयाँ बाटो निर्माण, कालो पत्रे त्यो संगसंगै मर्मतमा ध्यान दिनु जरुरी छ ।’

नेम्बाङले अहिलेसम्मको भौतिक प्रगति तथा पूँजिगत खर्च साह्रै न्यून र निराशाजनक रहेको भन्दै यतातिर गम्भिर हुन निर्देशन समेत दिए । उनले निर्देशन दिदै भने ‘हामी गम्भिर बन्न जरुरी छ । हामी जबाफदेहि बन्न जरुरी छ । देशको अधिकांश भौतिक निर्माणका जिम्मेवारी हामीले लिएका छौ । हाम्रो कामबाट मुल्ुक परिवर्तित हुने भएकाले हामी सबै जिम्मेवार हुनुपर्छ ।’

उनले जिम्मेवार तहमा रहेकाले आत्मसमिक्षा गर्नु पर्ने उल्लेखे गर्दै भने ‘हामीले आत्मसमिक्षा गर्नु जरुरी छ । मैले ध्यान दिएन भने कस्ले दिन्छ । मैले गरिन भने कस्ले गर्छ । मुल्ुक निर्माण गर्ने महत्वपूर्ण ठाउँमा हामी छौ । त्यो जिम्मेवारी राज्यले दिएको छ । अधिकार दिएको छ । सुविधा दिएको छ । बजेट दिएको छ । हामीले मात्रै कार्यान्वयन गर्ने हो ।’