काठमाडौं । बुधबार महाराजगन्ज प्रहरीद्वारा त्रिवि शिक्षण अस्पतालका डाक्टरमाथि कुटपिट गएको घटना सेलाउन नपाउँदै राजधानीमा फेरि त्यस्तै घटना घटेको छ ।
बिरामीको लागि औषधि किन्न मेडिकल गएका सर्वसाधारणमाथि प्रहरीले कुटपिट गरेको हो ।
कलंकीमा मेडिकलमा औषधि किनेर डेरातर्फ फर्किँदै गरेकी महिलामाथि नगर प्रहरी कार्यालय, भृकुटीमण्डपका खटिएका प्रहरी टोलीले निर्घात कुटपिट गरेको हो। उनले कुटपिट गरेको भिडियो अहिले सामाजिक सञ्जालमा भाइरल बनेको छ ।
हेल्थ पाटी युटुब च्यानलले सार्वजनिक गरेको भिडियोमा प्रहरी र तीन जना सर्वसाधारणबीच सामान्य भनाभन भएको देखिन्छ । तीमध्ये दुई जना महिलाले हातमा औषधिको पोको बोकेका छन् ।
विवादकै क्रममा एकाएक इन्सपेक्टर नेतृत्वको प्रहरी टोलीले निर्घात कुटपिट गरेको देखिन्छ । महिलामाथि अन्धाधुन्ध लाठी बर्साइएको छ ।
औषधि बोकेको सर्वसाधारणमाथि निर्घात कुटपिट गरेको भन्दै प्रहरीको चर्को आलोचना भएको छ । उनीमाथि कारबाही गर्नुपर्ने आवाज समेत उठेको छ।
केही दिनअघि सोही टोलीले काठमाडौंका एक जनप्रतिनिधिलाई समेत दुर्व्यवहार गरेको बताइएको छ ।
यो खबर पढेर तपाईलाई कस्तो महसुस भयो ?
प्रतिक्रिया