कर्णाली । कर्णाली प्रदेशका भूमि व्यवस्था, कृषि तथा सहकारीमन्त्री विमला केसीले मानव जीवनका लागि कृषि अन्तिम विकल्प भएको बताएकी छन् । भूमि व्यवस्था, कृषि तथा सहकारी मन्त्रालय तथा कृषि विकास निर्देशनालयअन्तरगत आव ०७६/०७७ मा निर्माण सम्पन्न भएका योजनाहरुको प्रभावकारिता अनुगमन गर्न सोमवार वीरेन्द्रनगर नगरपालिकाको ३ र १० वडामा पुगेकी मन्त्री केसीले मानव जीवनका लागि कृषि अपरिहार्य रहेको बताएकी हुन् ।
उनले भनिन्, “तपाई हामीले खेती गरेको आर्जनबाट घर बनाएकालाई सम्मान गरौँ । श्रमविना भ्रष्टाचार एवं अनियमितता गरेर महल ठड्याउनेलाई सबैले अस्वीकार गरौँ ।” उत्पादनशील जमीनमा तरकारी लगाएर आफूसहित कर्णालीलाई आत्मनिर्भर बनाउन कृषकहरुलाई उनले आग्रह गरिन् । महिला र त्यसमा पनि दलित महिलाले अवसर पाए सजिलै काम गर्न सक्दा रहेछन् भन्ने राम्रो उदाहरण देखाएको भन्दै मन्त्री केसीले सुर्खेत बामेखोला ग्रामीण कृषि सडक उपभोक्ता समितिका अध्यक्ष लक्ष्मी विकले उनको कामको उच्च प्रशंसा गरिन्।
उपभोक्ता समितिका अध्यक्ष विकले सरकारले गरेको सहयोगले गरिब किसानहरुको पहुँच बजारसँग जोडिएको बताइन् । “कृषि विकास निर्देशनालयले गत आवमा गरेको १७ लाख रुपैयाँ सहयोगले कल्भर्ट र ३०० मिटर सडक निर्माण भएको छ । अब त्यसमा ग्राभेलका लागि सरकारले थप सहयोग गरे उत्पादित तरकारी जतिबेला पनि बेच्न बजार लिन सकिन्छ,” उनले भनिन् । कृषि विकास निर्देशनालयका निमित्त निर्देशक चित्रबहादुर रोकायले कल्भर्ट र सडक निर्माणले करिव २०० घर परिवार लाभान्वित भएको बताए ।
ब्राईट मध्यपश्चिम कृषि तथा वन विज्ञान क्याम्पस सुर्खेतका प्रबन्ध निर्देशक पुष्कर खड्काले वीरेन्द्रनगर–३ तातोपानीस्थित पाँच बिघा जमीनमा २५ लाख रुपैयाँमा निर्मित एकीकृत अर्गानिक कृषि मोडल फार्म प्रदर्शनी तथा अनफार्म अनुसन्धान प्लट स्थापनाले कर्णालीको कृषि तथा कृषि प्राविधिक जनशक्ति उत्पादनमा सहयोग पुग्ने बताए। रासस
यो खबर पढेर तपाईलाई कस्तो महसुस भयो ?
प्रतिक्रिया