अर्थमन्त्रालयको ठाडो निर्देशन : ‘कोरोना बिमाको भुक्तानी ३ दिन भित्र गरिसक्नू’

काठमाडौं । कोरोना बिमाको रकम ७ दिनभित्रै भुक्तानी दिनू भन्ने अघिल्लो निर्देशन कार्यान्वयन नभएपछि अर्थ मन्त्रालयले बिमा समितिलाई अर्को निर्देशन पठाएको छ ।

अर्थमन्त्रालयले यस अघिको निर्देशन कार्यान्वयन नभएको भन्दै बिमा कम्पनीहरुको नियमनकारी निकाय बिमा समितिलाई ३ दिनभित्रै कोरोना बिमाको रकम भुक्तानी गरी सो जानकारी मन्त्रालयमा पठाउन निर्देशन दिएको हो ।

हाल कुन(कुन बिमा कम्पनीमा कति संख्यामा दाबी परेको छ सोको विवरण समेत पठाउन भन्दै अर्थ मन्त्रालयले समस्या समाधानका लागि समितिबाट के कति प्रयास भइरहेको छ र मन्त्रालयमा सहजीकरणका लागि पहल गर्नुपर्ने विषय के(के हुन् भन्दै त्यसको विस्तृत विवरण पठाउन समेत माग गरेको छ ।

अर्थमन्त्रालयले पठाएको पत्रमा ‘कोरोना बिमाको हालसम्मको दाबी संख्या, कागजात पूरा भएका दाबी संख्या, प्रमाणीकरणका लागि स्वास्थ्य सेवा विभागमा पठाएको संख्या, प्रमाणीकरण नभएका वा नक्कली दाबी विवरण, दाबी भुक्तानीको विवरण र सबै कागजात पूरा भई भुक्तानी गर्न बाँकी विवरण सार्वजनिक समेत गर्नुहुन अनुरोध छ ।’