काठमाडौं । स्पेनिस ला लिगा फुटबलमा एट्लेटिको मड्रिडले सहज जित हात पारेको छ । आइतवार राति भएको खेलमा एट्लेटिकोले काडिजलाई ४-२ गोल अन्तरले पराजित गरेको हो ।
खेलको २८ औं मिनेटमा सुआरेजले गोल गर्दै टोलीलाई अग्रता दिलाएका थिए । खेलको ३५ औं मिनेटमा अल्भारोले गोल गर्दै काडिजलाई १-१ गोलको बराबरीमा फर्काए ।
खेलको ४४ औं मिनेटमा सउल निगुएजले गोल गर्दै एट्लेटिकोलाई २-१ को अग्रता दिलाए । ५० औं मिनेटमा सुआरेजले पेनाल्टीमा गोल गर्दा एट्लेटिको ३-१ ले अघि रह्यो ।
खेलको ७१ औं मिनेटमा अल्भारोले व्यक्तिगत दोस्रो गोल गर्दै काडिजलाई २-३ गोलको स्थितिमा ल्याए । त्यसपछि खेलको ८८ औं मिनेटमा कोकेले गोल गर्दै एट्लेटिकोलाई ४-२ को सहज जित दिलाए ।
जितसँगै एट्लेटिकोले १९ खेलमा ५० अंक जोडेको छ । एट्लेटिकोले लिगमा १० अंकको अग्रता समेत बनाएको छ ।
दोस्रो स्थानको रियल मड्रिडले ४० अंक जोडेको छ । काडिज २४ अंक जोडेर १३ औं स्थानमा रहेको छ ।
- एजेन्सी
यो खबर पढेर तपाईलाई कस्तो महसुस भयो ?
प्रतिक्रिया