नेपाली काँग्रेसका नेता तथा विघटित प्रतिनिधिसभा सदस्य मोहन आचार्यले रसुवाको विकासमा आफू लागिपरेको बताएका छन् । जनप्रतिनिधिको हैसियतमा आफूलाई पूर्वधार विकासको क्षेत्रमा राम्रो ज्ञान रहेको भन्दै उनले रसुवाका अरु जनप्रतिनिधिले पनि राम्रो सहयोग गरिरहेको भन्दै आभार प्रकट गरे ।
नौकुण्ड गाउँपािलकास्थित आरुखर्क जुरेढुंगा युवा समाजद्वारा आयोजित सोनाम ल्होसार कार्यक्रममा उनले गाउँगाउँमा पुगेको सडकमा रसुवाली जनतालाई आफ्नै गाडी चढेर हिँड्ने हैसियतमा पुर्याउने आफ्नो चाहना रहेको भन्दै त्यसका लागि निरन्तर पहल गर्ने बताए ।
उनले भने, ‘पूर्वाधारका विषयमा आउने दिनमा के गर्ने भन्ने कुरा मलाई राम्रोसँग ज्ञान छ, हामी विभिन्न भूगोलहरुमा सडक बाटाहरु बनायौँ । अब त्यही बाटामा गाडी चढ्ने अवस्थामा रसुवाली दाजुभाइ तथा दिदीबहिनीलाई पुर्याउनुपर्छ भन्ने जमर्को हामीले लिएका छौं ।’
त्यसका लागि आगामी दिन धेरै काम गर्न बाँकी रहेको उल्लेख गर्दै उनले केरुङ नाकाले पनि धेरै रसुवाली जनतालाई अवसर प्रदान गर्न सक्ने बताए । यद्यपी नाका पूर्ण रुपमा सञ्चालन हुनुपर्ने उनको माग छ ।
नाका प्रभावित हुँदा रसुवाली जनताको गरिखाने बाटो बन्द भएको ,ऋण गरेर ४०० भन्दा बढी कन्टेनर खरिद गरेका रसुवालीहरु आज किस्ता तिर्न नसकेर गाडीनै बुझाउने अवस्थामा पुगेको बताउँदै उनले जसका कारण धेरैको रोजीरोटी गुमेको बताए ।
१ वर्षदेखि चिनियाँ भूभागमा रहेका गाडी र १००० बढी कन्टेनर र सामग्री के कस्तो अवस्थामा छन् भन्ने थाहा नभएको भन्दै उनले ब्याज र किस्ता तिर्न नसकेर १ जना व्यापारीले आत्महत्या नै गरेको खबरले दुःखी बनाएको पनि सो क्रममा बताए ।
कार्यक्रममा बागमती प्रदेश सांसद प्रेम तामाङ, उत्तरगया गाउँपालिकाका प्रमुख उपेन्द्र लम्साल, नौकुण्ड गाउँपालिकाका अध्यक्ष नुर्पु साङ्बो घले, आमाछोदिङ्मो गाउँपालिकाका अध्यक्ष बुचुङ तामाङलगायतको उपस्थित रहेको थियो ।
यो खबर पढेर तपाईलाई कस्तो महसुस भयो ?
प्रतिक्रिया