रामेछापमा बस दुर्घटना : १८ जना घाइते

काठमाडौं । रामेछापको सालुबाट मन्थलीतर्फ आउँदै गरेको बस दुर्घटना भएको छ । सेतिदेवी मावि सालुका विद्यार्थी र स्काउटको टोली चढेको बा ५ ख २८५७ नम्बरको बस दुर्घटना भएको हो ।

आज (शुक्रवार) बिहान भएको दुर्घटनामा बसमा सवार ५३ जनामध्ये १८ जना घाइते भएको जिल्ला प्रहरी कार्यालय रामेछापले जनाएको छ । दुर्घटनामा २ जनाको अवस्था गम्भीर रहेको छ ।

बसमा सदरमुकाम मन्थलीमा राष्ट्रपति रनिङ शिल्ड प्रतियोगितामा सहभागी हुन जाँदै गर्दा दुर्घटनामा परेको हो । प्रहरीका अनुसार तीव्र गतिका कारण साइड दिन नमिल्दा बस सडकमै पल्टिएको थियो । चालकलाई नियन्त्रणमा लिएर घटनाको थप अनुसन्धान भइरहेको प्रहरीले जनाएको छ ।