रोनाल्डोको गोलमा युभेन्टस विजयी

काठमाडौं । इटालियन सिरी ए फुटबलमा युभेन्टसले सहज जित हात पारेको छ । मंगलवार राति भएको खेल्न युभेन्टसले स्पेजियालाई ३-० गोल अन्तरले पराजित गरेको हो ।

घरेलु मैदानमा युभेन्टसलाई जित दिलाउन अल्भारो मोराटा, फेडरिको चिइसा र क्रिस्टियानो रोनाल्डोले एक एक गोल गरे । पहिलो हाफ गोलरहित बराबरीमा रोकिएको युभेन्टसले ६२ औं मिनेटमा मोराटाको गोलबाट अग्रता बनाएको थियो ।

खेलको ७१ औं मिनेटमा फेडरिकोले गोल गर्दै युभेन्टसको अग्रता २-० को बनाए ।

त्यसपछि खेलको ८९ औं मिनेटमा रोनाल्डाले गोल गर्दै युभेन्टसलाई ३-० को जित दिलाए । यस्तै खेलको इन्जुरी समयमा स्पेजियाका एन्ड्रीले पेनाल्टीमा गोल गर्न सकेनन् ।

यस गोलसँगै रोनाल्डोले सिजनको २० औं गोल पुरा गरेका छन् । रोनाल्डोले युरोपको शीर्ष पाँच लिगमा लगातार १२ सिजन २० भन्दा बढी गोल गर्ने खेलाडीको कीर्तिमान बनाएका छन् ।

यस्तै रोनाल्डोले यस खेलसँगै ६०० औं लिग खेलको कोशेढुंगा समेत पूरा गरेका छन् ।

तेस्रो स्थानको युभेन्टसले २४ खेलमा ४९ अंक जोडेको छ । स्पेजिया २५ अंक जोडेर १६ औं स्थानमा रहेको छ ।

• एजेन्सी