खेलको अन्तिम मिनेटमा गोलकिपरले गरे गोल, हारबाट जोगियो सेभिया

काठमाडौं । स्पेनिस ला लिगा फुटबलमा सेभिया बराबरीमा रोकिएको छ । शनिवार राति भएको खेलमा सेभिया रियल भालाडोलिडसँग १-१ गोलको बराबरीमा रोकिएको हो ।

भालाडोलिडको मैदानमा अन्तिम समयमा गोलकिपर यासिन बोउनोउले गोल गरेपछि सेभियाले बराबरी खेलेको हो । खेलको ४४ औं मिनेटमा फाबियन ओरेल्लानाले पेनाल्टीमा गोल गर्दै भालाडोलिडलाई १-० को अग्रता दिलाएका थिए ।

तर, खेलको इन्जुरी समयमा यासिन बोउनोउले गोल गर्दै सेभियालाई १-१ गोलको बराबरीमा फर्काए ।

यस बराबरीसँगै सेभियाले २८ खेलमा ५५ अंक जोडेको छ ।

सेभिया लिगको चौंथो स्थानमा रहेको छ । भालाडोलिड २७ अंक जोडेर १६ औं स्थानमा रहेको छ ।

• एजेन्सी