चोरी कार्यमा संलग्न रहेको अभियोगमा ८ जना पक्राउ

बर्दिया । चोरी कार्यमा संलग्न रहेको अभियोगमा प्रहरीले बर्दियाको बढैयाताल गाउँपालिका–१ बस्ने २३ वर्षीय याम बहादुर बिसी र २२ वर्षीय कमल खड्का सहित ८ जनालाई प्रहरीले पक्राउ गरेको छ ।

बढैयाताल गाउँपालिका १ को वडा कार्यालयबाट चैत १४ गते ३ थान कम्प्युटरको सिपियू सहित अन्य सामग्रीहरु चोरी भएको घटनाको अनुसन्धानको सिलसिलामा ईलाका प्रहरी कार्यालय मैनापोखर बर्दियाबाट खटिएको प्रहरीले चोरी भएका सामानहरु याम बहादुरको घरबाट बरामद गरेको थियो ।

उक्त घटना पश्चात् भागी फरार रहेका याम बहादुर र कमल समेत ८ जनालाई प्रहरीले पक्राउ गरेको हो ।

पक्राउ परेका उनीहरू उपर चोरी सम्बन्धी कसूरमा थप अनुसन्धान भइरहेको जिल्ला प्रहरी कार्यालय बर्दियाले जनाएको छ ।