कोरोनाको हालसम्मको रेकर्ड ‘ब्रेक’, : एकैदिन थपिए ७४ सय ४८ संक्रमित, ३७ को मृत्यु

काठमाडौं । नेपालमा दिनानुदिन कोरोना संक्रमणको नयाँ रेकर्ड कायम भइरहेको छ । नेपालमा पछिल्लो २४ घण्टामा एकैदिन थप ७ हजार ४ सय ४८ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार १६ हजार ६५८ पिसिआर परीक्षणमा ७ हजार ३८८ जना र ५१८ एन्टिजेन परीक्षणमा ६० जना गरी एकैदिन ७ हजार ४४८ जनामा कोरोना संक्रमण पुष्टि भएको हो।

योसँगै नेपालमा कोरोनाका कुल संक्रमितको संख्या ३ लाख ४३ हजार ४ सय १८ पुगेको मन्त्रालयले जनाएको छ ।

त्यस्तै पछिल्लो २४ घण्टामा नेपालमा कोरोना संक्रमणको कारण हालसम्मकै उच्च संख्यामा मृत्यु भएको छ । पछिल्लो २४ घण्टामा थप ३७ जनाको मृत्यु भएसँगै कुल मृतक संख्या ३३ सय ६२ पुगेको मन्त्रालयले जनाएको छ । यसैगरी २ हजार २१ जना कोरोना संक्रमणमुक्त हुँदा कोरोना मुक्त हुनेको संख्या २ लाख ८६ हजार १५ पुगेको छ ।

यसअघि आइतवार नेपालमा उच्च संक्रमित थपिएका थिए । आइतवार नेपालमा एकैदिन ७ हजार २ सय ११ कोरोना संक्रमित थपिएका थिए भने २७ जनाको कोरोना संक्रमणको कारण ज्यान गएको थियो ।