एनएसएल : आज समूह चरणको अन्तिम खेल, चितवन प्रतिष्ठाको लागि खेल्दै

काठमाडौं।  नेपाल सुपर लिग (एनएसएल) अन्तर्गत आज (आइतवार) समूह चरणको अन्तिम खेल हुँदै छ।

दशरथ रंगशालामा साँझ ५:३० बजे खेलिने सो खेलमा काठमाडौं रेजर्स एफसी र एफसी चितवन भिड्दै छन्।

प्लेअफमा स्थान पक्का गरिसकेको काठमाडौंको टोली चितवन विरुद्धको खेलमा जित निकाल्दै अंक तालिकामा शीर्ष स्थान ओगट्नै योजनामा छ।

उता चितवन भने प्रतियोगितामा जित विहिन छ। चितवन प्रतियोगिताबाट बाहिरिसकेको अवस्था छ। ५ खेलमा २ अंकका साथ पुछारमा रहेको चितवनको टोलीले आजको खेल आफ्नो प्रतिष्ठाको लागि खेल्ने छ।

चितवन आजको खेलमा जित निकाल्दै प्रतियोगिताको अन्त्य सुखदरूपमा गर्न चाहन्छ।

एनएसएलको प्लेअफमा स्थान पक्का गर्ने चार टोली धनगढी, काठमाडौं, ललितपुर र बुटवल लुम्बिनी रहेका छन्।