नाडाल र जोकोभिच फ्रेन्च ओपनको दोस्रो चरणमा

काठमाडौं।  जारी फ्रेन्च ओपन उर्फ ‘रोलान्ड गारोस’ प्रतियोगितामा साविक विजेता रफाएल नाडाल र विश्व नम्बर एक नोभाक जोकोभिच दोस्रो चरणमा प्रवेश गरेका छन्।

मंगलवार राति भएको खेलमा ‘१३’ पटक फ्रेन्च ओपन विजेता नाडालले अष्ट्रेलियाका एलेक्सी पोपिरिनलाई ६-३, ६-२ र ७-६ (७/३) को सेटमा पराजित गरेका हुन्। विश्व वरीयतामा तेस्रो नम्बरमा रहेका ‘क्ले कोर्ट’ का राजा नाडालले दोस्रो चरणमा फ्रान्सका रिचर्ड गास्कवेटसँग प्रतिस्पर्धा गर्ने छन्।

त्यस्तै गए राती नै ‘फिलिप चारट्रिएर’ मैदानमा भएको खेलमा विश्व नम्बर १ नोभाक जोकोभिचले अमेरिकी टेनिस साण्डग्रेनलाई ६-२, ६-४, ६-२ को सेटमा पराजित गरेका छन्।

गत वर्षका उप-विजेता जोकोभिचले अब दोस्रो चरणमा उरुगुवेका पाब्लो कुवेभाससँग प्रतिस्पर्धा गर्ने छन्।