चुरे दोहनको निर्णयको विरोपछि अर्थको प्रेस विज्ञप्ती : भन्यो- ‘संरक्षण गर्न सरकार प्रतिवद्ध छ’

काठमाडौं । चुरे दोहनको निर्णय गरेको सरकारले चौतर्फी विरोध भएपछि स्पष्टीकरण दिएको छ ।

बुधवार (आज) अर्थ मन्त्रालयले विज्ञप्ती जारी गर्दै स्पष्टिकरण दिएको हो ।

‘नेपाल सरकार चुरे क्षेत्रको संरक्षण र सम्बर्द्धन गर्न प्रतिबद्ध छ । चुरे क्षेत्रको दोहन हुन नदिन र वातावरण संरक्षणमा नकारात्मक प्रभाव पर्न नदिन सचेत रहेको छ । ’ मन्त्रालयद्धारा जारी विज्ञप्तिमा उल्लेख छ । मन्त्रालयले चुरे क्षेत्रमा ढुङ्गा, गिट्टी, बालुवा लगायत निर्माण सामग्रीको दोहन हुन नदिने नीतिको मूल मर्म भएको जनाएको छ ।

सरकारले गत १५ गते जारी गरेको बजेट वक्तव्यमा खानी तथा भूगर्भ विभागले पहिचान गरेका र वातावरणीय प्रभाव मूल्यांकन प्रतिवेदन बमोजिम चुरे/भावर/शिवालिक र नदी प्रणाली बाहेकका उपयुक्त क्षेत्रमा खानी उत्खनन् गर्ने नीतिगत दृष्टिकोण प्रस्तुत गरिएको छ । त्यस्तै,मन्त्रालयले आर्थिक वर्ष २०७८/७९ को आय–व्ययको सार्वजनिक जानकारी वक्तव्यमा उल्लेखित वातावरणीय प्रभाव मुल्यांकनको आधारमा खानीजन्य ढुङ्गा, गिट्टी, बालुवा निकासी गरी व्यापार घाटा न्यूनीकरण गरिने जनाएको छ ।

त्यस्तै,सो प्रेस विज्ञप्तीमा ‘सम्बन्धित सरकारी निकाय, वातावरणविद्, विषय विज्ञ र सरोकारवालाहरुसँग छलफल गरी प्राप्त हुने सल्लाह र सुझावका आधारमा कार्यविधि, निर्देशिका, मापदण्ड एवं कानूनी प्रबन्ध गर्न तथा वातावरण र जीविकामा प्रतिकूल असर नपर्ने व्यवस्था मिलाउन नेपाल सरकार पूर्ण प्रतिबद्ध रहेको व्यहोरा समेत सबैलाई अनुरोध गर्न चाहन्छु ।’ भनिएको छ ।