नारायणगढ–मुग्लिङ सडकखण्डको म्याद फेरी थपियो

काठमाडौं–तोकिएको समयमा काम सम्पन्न गर्न नसकेपछि निर्माणाधिन नारायणगढ–मुग्लिङ्ग सडकखण्डको म्याद चौंथो पटक थप गरिएको छ ।सडक डिभिजन विभागले सो सडकखण्डको म्याद पुनः ३ महिना थपेको हो । सन् २०१५ को अप्रिलमा अर्थात् २०७२ को बैशाखमा काम सम्पन्न गर्ने गरी उक्त सडकको मर्मत कार्य सुरु भएको थियो ।तोकिएको समयमा काम सम्पन्न गर्न नसकेपछि ४ पटक गरी १३ महिना म्याद थप गरिएको छ । अघिल्लो पटकको म्याद अनुसार २०१८ को फेबु्रअरी अर्थात् २०७४ को फागुनभित्र सडकको काम सक्नुपर्ने थियो तर काम नसकिएपछि अहिले पुन २०१८ कै ‘मे’ सम्मको म्याद थप भएको नारायणगढ–मुग्लिङ्ग सडक आयोजनाका सूचना अधिकारी इन्जिनियर शिव खनालले जानकारी दिए ।नयाँ थप भएको समयअनुसार अब २०१८ को मे अर्थात २०७५ सालको जेठ महिनाभित्र काम सक्नुपर्ने हुन्छ । २ अर्ब ८८ करोड ७० लाखमा ठेक्का सम्झौता भएको उक्त सडकको काम अहिलेसम्म ८२ प्रतिशत सकिएको छ । कटिङ्गको काम सकिन लागेकोले अब कामले तिब्रता पाउने इन्जिनियर खनालको दाबी छ । निर्माण कार्यलाई तीव्रता दिन बिहान १० बजेदेखि ४ बजेसम्म सवारी आवागमन बन्द गरेर सडकको काम गरिदै आएको छ ।