आइस हकी खेलाडी सवार गाडी दुर्घटना, १४ जनाको मृत्यु

ओटावा, २४ चैत । क्यानडाको जुनियर आइस हकी खेलाडी लिएर गइरहेको बस र ट्रक ठोक्किएर भएको दुर्घटनामा परी १४ जनाको मृत्यु भएको छ ।क्यानडाको जुनियर आइस हकीको हम्बोल्ट ब्रान्कोसको टिमका सदस्यहरु बसमा सवार थिए । रोयल क्यानेडियन माउन्टेड प्रहरीले बसमा २८ जना सवार रहेको र दुर्घटनामा चालकसहित १४ जनाको मृत्यु भएको छ भने बाँकी १४ जनालाई उपचारका लागि अस्पताल लगिएको छ ।प्रधानमन्त्री जस्टिन ट्रुडोले ट्विटरमा लेखेका छन्, ‘म कल्पना पनि गर्न सक्दिन कि यतिबेला उनीहरुका आमाबाबुले कस्तो समय गुजारिरहेका होलान् ।’स्थानीय समयअनुसार साँझ ५ बजे सो दुर्घटना भएको हो । हम्बोल्ट ब्रान्कोस टिम सस्कैचवन जुनियर हकी लिग खेल्दै आएको छ । यसका खेलाडी निवाविन हक्सविरुद्ध एक खेल खेल्न गइरहेका बेला दुर्घटनामा परेको हो । टोलीका सदस्यहरु १६ देखि २१ वर्ष उमेरका थिए ।