१४ नोभेम्बरलाई विश्व मधुमेह दिवसको रूपमा संयुक्त राष्ट्र सङ्घले सन् २००६ देखि जनचेतना जगाउने दृष्टिकोणबाट मनाउन थाले पनि यो रोगका रोगीहरूको सङ्ख्या विश्वभर घट्नुको सट्टा अझ बढी रहेको छ ।
‘मधुमेह हेरचाहमा पहुँच– यदि अहिले हैन भने, कहिले ?’ भन्ने नाराका साथ मनाउन लागिएको यो दिवसमा यो वर्ष १ सय ६० भन्दा बढी राष्ट्रका १ अर्ब व्यक्ति जनचेतना जगाउने कार्यक्रममा सरिक हुने अनुमान गरिएको छ ।
विश्वमा मधुमेह रोगीहरूको सङ्ख्या बढ्नुमा चिकित्सकहरूले उचित खानपिन, स्वस्थ जीवनशैली नहुनुलाई मुख्य कारण मानेका छन् । अन्तर्राष्ट्रिय डायबिटिज फेडेरेसनका अनुसार सन् २०१९ मा विश्वमा ४६ करोड ३० लाख व्यक्तिमा मधुमेह रहेको थियो । यो सङ्ख्या अहिले बढेर ५३ करोड ७० लाख पुगेको छ भने सन् २०३० सम्ममा ५७ करोड ८० लाख व्यक्ति मधुमेहबाट पीडित हुने अनुमान गरिएको छ ।
फेडेरेसनको तथ्याङ्क अनुसार प्रत्येक दुई जनामा एक जना मधुमेह भएको व्यक्तिको परीक्षण हुन सकेको छैन भने प्रत्येक ४ जनामा ३ जना मधुमेहका बिमारीहरू कम आय भएका व्यक्तिहरू हुने गरेका छन् । सोही तथ्याङ्क अनुसार सन् २०१९ मा ४२ लाख व्यक्तिको मृत्यु मधुमेहकै कारण भएको थियो ।
दक्षिण पूर्वी एसियामा प्रत्येक ११ जनामा एक जनालाई मधुमेह भएको पाइएको छ । यो क्षेत्रमा सन् २०३० मा ११ करोड ३० लाख व्यक्ति मधुमेहबाट पीडित हुनेछन् भने सन् २०४५ सम्ममा यो सङ्ख्या बढेर १५ करोड १० लाख पुग्ने अनुमान गरिएको छ । यहाँ सन् २०२१ मा मधुमेहका कारण ७ लाख ४७ हजार मानिसको ज्यान गएको थियो ।
विश्व स्वास्थ्य सङ्गठनका अनुसार नेपालमा मधुमेहका बिमारीको सङ्ख्या ४ लाख ४६ हजार भन्दा बढी रहेको छ । अहिले मधुमेहको वृद्धिदरलाई हेर्ने हो भने सन् २०३० सम्ममा नेपालमा मधुमेहका बिमारीको सङ्ख्या १३ लाख २८ हजार पुग्ने अनुमान गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया