किन सैफ अली खानलाई सम्झँदै छन् दर्शक?

मुम्बई । करिअरको नरमाइलो समय बेहोर्दैछन् सैफ अली खान । फिल्म चल्न त बन्द भएका छन् नै उनलाई फिल्म पाउन पनि गाह्रो भएको छ । वेब सिरिज गरेर उनले काम चलाइरहेका छन् । माथिबाट फेरि सलमान खानले उनको रेस ३ को फ्रेन्चाइजमा पनि हात हाले ।

सलमानलाई जब रेस ३ मा सैफको सट्टा लिइयो, त्यतिबेला सलमानले सबैभन्दा पहिले सैफ अली खानलाई फोन गरेर सोधे, कुनै आपत्ति त छैन?

सुपर सितारा सलमान खानलाई के जवाफ दिनु? उनलाई सलमानका साथ सेकेन्ड लिडको रोल अफर गरिएको थियो, तर सैफले इन्कार गरिदिए ।

रेस सिरिजको फिल्मका हिरो रहेका सैफ किन सेकेन्ड लिड गरुन्? यसै पनि फिल्ममा सलमान खान हुन्छन् भने कसैलाई केही गर्नका लागि बाँकी नै के रहन्छ र !

रेस ३ सिनेमाघरमा रिलिज पनि भयो । तर, फिल्म देखेर दर्शकलाई खुशीभन्दा धेरै रिस उठ्यो । मनोरञ्जनका नाममा फिल्म त बिगारे नै फ्रेन्चाइजलाई पनि बरबाद गरे भन्दै दर्शक रिसाए । रेमो डिसुजाले घटिया फिल्म बनाउनका लागि कुनै कसर बाँकी राखेनन् भन्दै गालीका गाली बर्साएका छन् ।

फिल्म हेरेपछि दर्शकले सैफलाई याद गर्न थाले । सैफका दर्शकले रेस सिरिजलाई मिस गरे । सैफका लागि यो राहतको कुरा हो कि, यतिबेला उनको समय गलत चलिरहेको छ तर उनलाई दर्शकले भने याद गरिरहेका छन् ।