हिंसामा परेका बैतडीका महिला सुरक्षित आवासगृहमा

बैतडी : पाटनमा महिला सुरक्षित आवासगृह सञ्चालनमा आएपछि हिंसामा परेका महिलाले न्याय पाउन थालेका छन् । 

विसं २०७३ मंसिरदेखि सञ्चालनमा आएको उक्त आवासगृहबाट अहिलेसम्म हिंसामा परेका ७४ महिलाले सेवा लिएको संयुक्त राष्ट्रसंघीय जनसङ्ख्या कोषका जिल्ला कार्यक्रम अधिकृत गणेश शाहीले जानकारी दिए । हिंसाको प्रतिरोध गर्न हिंसापीडित महिलालाई सुरक्षित महिला आवासगृहमार्फत सजिलो भएको उनको भनाइ छ । 

उहाँले भन्नुभयो, “सुरक्षित आवासगृहमा हिंसामा परेकालाई महिलालाई परामर्श दिने गरिएको छ ।” आवासगृहमा घरेलु हिंसा, बालविवाह, बलात्कार, बहुविवाह, लैंगिक हिंसालगायत घटनाबाट पीडित महिला आउने गरेका छन् । हिंसामा परेका महिलालाई सहयोग पु-याउने उद्देश्यले आवासगृह सञ्चालन गरिएको सञ्चालन समितिका संयोजक जानकी अवस्थीले बताए । 

आवासगृहमा हिंसामा परेका महिलालाई ३५ दिनसम्म निःशुल्क खान बस्नको व्यवस्था गरिएको छ । उनीहरूलाई निःशुल्क कानूनी उपचारसमेत प्रदान गरिन्छ । अवस्थीका अनुसार ३५ दिनसम्म पुनःस्थापना नभए वा पुनः हिंसामा पर्ने देखिए पीडित महिलालाई आवासगृहमै राख्ने गरिएको छ । संयुक्त राष्ट्रसंघीय जनसंख्या कोषको सहयोग, महिला तथा बालबालिका कार्यालयको समन्वयमा उदयदेव महिला बचत तथा ऋण सहकारी संस्थाले उक्त आवासगृह सञ्चालन गरेको हो । 

आवासगृह सञ्चालनमा आएपछि हिंसामा परेका महिलालाई सहज भएको महिला विकास निरीक्षक बिष्ना भण्डारीले जानकारी दिए। आवसगृह लामो समयसम्म सञ्चालन गर्नका लागि सक्दो सहयोग गर्ने पाटन नगरपालिकाका उपप्रमुख सरस्वती कोलीले बतार्इन् ।