काठमाडौं । भदौ १५ मा रिलिज गर्ने भनिएको चलचित्र ‘चंगा चेट’ को पहिलो गीत सार्वजनिक भएको छ । प्राविधिक कारणले गर्दा लामो समय उल्झनमा परेको फिल्मको ‘गोजीमा दाम छैन’ बोलको गीत सार्वजनिक गरिएको हो ।
सोमवार काठमाडौंमा एक कार्यक्रमको आयोजना गर्दै फिल्मको गीत सार्वजनिक गरिएको हो । कार्यक्रममा फिल्मका मुख्य कलाकार तथा निर्माता, निर्देशक उपस्थित थिए ।
निर्देशक दीपेन्द्र के खनाल, निर्माता माधव वाग्ले, शर्मिला पाण्डे, कलाकार सन्दीप क्षेत्री, सुरक्षा पन्त, आयुष्मान देशराज जोशी, प्रियंका कार्की, रविन्द्र झा लगायतका कलाकार उपस्थित रहेको कार्यक्रम निर्धारित समयभन्दा निकै ढिलो शुरु भएको थियो ।
चलचित्रमा राजनराज शिवाकोटीले संगीत भरेका छन् भने राजनराज शिवाकोटी, मेलिना राई र ग्रिष्मा शिवाकोटीले स्वर दिएका छन् । यस्तै गीतका शब्दलाई हरिहर तिमिल्सिनाले लेखेका हुन् ।
भिडियोमा फिल्मका मुख्य कलाकार आयुष्मान देशराज जोशी, प्रियंका कार्की, सन्दीप क्षेत्री, सुरक्षा पन्त, परमिता राणा, रविन्द्र झा लगायत छन् भने यो फिल्मलाई माधव वाग्ले र शर्मिला पाण्डेले निर्माण गरेका हुन् ।
प्रदीप भारद्वाजले लेखेको फिल्ममा दीपेन्द्र के खनालको निर्देशन रहेको छ भने अर्पण थापा, माओत्से गुरुङ, सरिता गिरी, पुष्कर गुरुङ लगायतले समेत अभिनय गरेका छन् ।
चलचित्र आउँदो कार्तिक १६ गतेदेखि नेपालभर प्रदर्शन हुँदैछ ।
यो खबर पढेर तपाईलाई कस्तो महसुस भयो ?
प्रतिक्रिया