मधेश प्रदेश सरकारले दलित बालबालिकाको खातामा बर्सेनि २ हजार जम्मा गरिदिने

जनकपुर । मधेश प्रदेश सरकारले जीवन निर्वाह खर्च भन्दै एक अर्ब रुपैयाँ वितरणमुखी रकम विनियोजन गरेको छ ।

मधेश प्रदेशका अर्थमन्त्री शैलेन्द्रप्रसाद साहले २०७९/८० को बजेट विनियोजन विधेयक पेस गर्दै दलित बालबालिकाका लागि खातामा रकम जम्मा गरिदिनेसमेत घोषणासमेत गरेका छन् ।

‘मधेश प्रदेशका अत्यन्त विपन्न, कुनै नियमित पारिवारिक आयस्रोत नभएका नागरिकहरूको नक्सांकन गरी परिचयपत्रका आधारमा ‘जीवन निर्वाह खर्च’को रूपमा सोझै बैंक खातामार्फत उपलब्ध गराउन एक अर्ब ५० करोड विनियोजन गरेको छु’ अर्थमन्त्री साहले बजेटमा भनेका छन्, ‘डोम, मुसहर चमार दुसाध र हलखोर जातिका बालबालिकाहरुलाई विद्यालयमा ल्याई साक्षरता दरमा वृद्धि गर्न र स्कुल छाड्ने दरलाई न्यून गर्न दलित शिक्षा अभियान अन्तर्गत प्रत्येक बालबालिकाको खातामा बर्सेनि दुई हजार रुपैयाँका दरले शिक्षा बिजक रकम उपलब्ध गराउन रु २ करोड विनियोजन गरेको छु ।’