कट्रिना भर्सेज अर्जुन : ‘फोन भूत’ र ‘कुत्ते’ एकै दिन रिलिज हुँदै

काठमाडौं । २०२२ सालको ६ महिना बितिसकेको छ । यो अवधिमा धेरै ठूला फिल्म रिलिज भए । यसैबीच बक्स अफिसमा हिन्दी र साउथ फिल्मबीच पनि कडा प्रतिस्पर्धा भएको थियो । तर आगामी ६ महिना हिन्दी सिनेमाका लागि पनि विशेष छन् ।

आगामी दिनमा धेरै हिन्दी फिल्म रिलिज हुन लागेका छन् र उनीहरुबीच भिडन्त पनि हुने भएको छ । यो लिस्टमा कट्रिना कैफ र अर्जुन कपुरको नाम पनि परेको छ । कट्रिना कैफ आफ्नो फिल्म ‘फोन भूत’मा व्यस्त छिन् भने अर्जुन कपूरको अर्को फिल्म ‘कुत्ते’ छ, जसको रिलिज मिति घोषणा गरिएको छ । दुबै फिल्म ४ नोभेम्बर २०२२ मा थिएटरहरूमा रिलिज हुनेछन्।

विशाल भारद्वाजका छोरा आकाश भारद्वाजको डेब्यु फिल्म ‘कुत्ते’ को रिलिज मिति शुक्रबार घोषणा गरिएको छ । यस फिल्ममा अर्जुन कपुर मुख्य भूमिकामा रहनेछन् । अर्जुनका अलावा फिल्ममा नसिरुद्दीन शाह, कोंकणा सेन शर्मा, तब्बु, कुमुद मिश्रा, राधिका मदन र शार्दुल भारद्वाजको पनि अभिनय रहेको छ ।

अर्जुन कपूरको फिल्मसँगै कट्रिनाको ‘फोन भूत’ पनि नोभेम्बर ४ मा रिलिज हुँदैछ, जसमा कट्रिनाका अलावा सिद्धान्त चतुर्वेदी र इशान खट्टर पनि देखिनेछन् । यो एक डरलाग्दो कमेडी फिल्म हो, जसमा डरसँग कमेडी हुनेछ। शुक्रबार फिल्मको मोसन पोस्टर र पोस्टर रिलिज गरिएको थियो ।