सौन्दर्य प्रतियोगिता महिलाहरुका लागि मात्र हो भन्ने अवधारणा पुरानो भएसँगै आजकल पुरुषहरुका लागि पनि विभिन्न सौन्दर्य प्रतियोगिताहरु आयोजना हुन थालेका छन् । त्यसै अन्तर्गत ‘अमाजोन इन्टरटेन्मेन्ट’ले आयोजना गरेको मिस्टर ह्यान्डसम नेपाल २०१८ को पहिलो श्रङ्खलाका विजेता हुन् मिलन रेग्मी ।
२६ वर्षे रेग्मी ६ फिट अग्ला छन् । नियमित व्यायामले गर्दा होला शरीर पनि फिट देखिएको । त्यस्तै अनुहार पनि नहाँस्दै हँसिलो लाग्ने । जेन्टल पर्सनालिटी । फेरि पेशाले शिक्षक भएकाले ज्ञानमा कमी हुने त कुरै भएन । भनिन्छ नि यसलाई त भगवान्ले फुर्सदमा बनाएका भनेर । यी सबै गुणहरुको सामञ्जस्यले नै उनलाई उपाधि दिलाएको हुनसक्छ । उनको भनाइ पनि यस्तै छ । ‘नाम सौन्दर्य प्रतियोगिता भएकाले सुन्दरतालाई मात्र प्राथमिकता दिइने होइन रहेछ, ओभरअल कुराहरुलाई मूल्याङ्कन गरियो ।’
उपाधि जितिसकेपछि फोन, म्यासेजमा भेल बनी आएका बधाई तथा शुभकामनाको प्रतिक्रिया दिन भ्याइनभ्याइ छ उनलाई । ‘रातोरात सेलिब्रेटी भएँ कि जस्तो लाग्दैछ ।’ उनले हाँस्दै बताए ।सौन्दर्य प्रतियोगितामा भाग लिने उनको कुनै योजना थिएन । तर, आफू जिम गर्न जाने ठाउँमा प्रतियोगिताको फर्म देखेपछि उनलाई अवसर खेर फाल्न मन लागेन । फेरि पहिलादेखि नै मोडलिङमा रुचि भएकाले यस्ता प्रतियोगिताले आफ्नो वर्षौंदेखिको चाहनालाई साकार बनाउने हो कि भन्ने अपेक्षा छुट्टै थियो ।
त्यसो त उनलाई अडिसनमा समेत चयन हुन्न कि भन्ने डर थियो तर, अडिसन पार गरेर प्रतियोगितामा ट्रेनिङ सेसन शुरु भएपछि भने उनले आफूलाई निखार्दै लगे । ‘विजेता नै हुन्छु भनेर निश्चित नभए पनि कुनै न कुनै टाइटल जित्छु भन्नेमा ढुक्क थिएँ ।’ उनले मख्ख पर्दै सुनाए ।
यस्ता प्रतियोगिताहरुमा पैसाकै भरमा जित्ने, जिताउने गरिन्छ भनेर उनले नसुनेका होइनन् । तर, वास्तविकता केही भिन्न लाग्यो उनलाई । यो क्षेत्र बाहिर जति बदनाम छ भित्र त्यति नराम्रो पनि रहेन रहेछ भन्ने उनको बुझाइ छ । त्यसैले आगामी दिनमा योभन्दा ठूलो स्तरको प्रतिस्पर्धामा सहभागी हुने अवसर जुट्यो भने उनले त्यसलाई उम्किन नदिने सोचमा छन् । ‘राष्ट्रलाई नै प्रतिनिधित्त्व गर्ने अवसर मिल्यो भने झन् गज्जब !’ रेग्मीले मुस्कुराउँदै आफ्नो इच्छा जाहेर गरे ।
प्रतियोगिता हुँदै गर्दा एकताका उनले बाहिरिने सोच पनि बनाइसकेका थिए । पढाइ, काम, प्रतिस्पर्धा सबैको प्रेसरले गर्दा समय व्यवस्थापन गर्न गाह्रो भइरहेको थियो उनलाई तर, आयोजकहरुले नै उनमा सम्भावना देखेर नबाहिरिन सल्लाह दिएपछि उनले आफ्नो निर्णय बदले । ठीक समयमा आफूले निर्णय बदलेकोमा अहिले उनलाई ढुक्क महसुस हुन्छ । आधि बाटो हिँडेर फर्किंदा फाइदा कसैलाई नहुने रहेछ भन्ने शायद बुझे उनले ।
पेशाले शिक्षक रेग्मी भविष्यमा शिक्षणलाई पार्ट टाइम पेशाको रुपमा लैजाने बताउँछन् । उनलाई मोडलिङमै विशेष रुचि भएकाले यसैमा बढी समय र ध्यान दिने उनको योजना छ । तर, उनलाई आफू शिक्षक भएकाले प्रतिस्पर्धामा धेरै मद्दत पुगेको जस्तो फिल हुन्छ । विद्यार्थीहरुमाझ उभिएर पढाउन बानी परेकाले स्टेजमा बोल्न उनलाई त्यति गाह्रो भएन । भन्छन्, ‘मासलाई फेस गर्न त्यति डर लागेन ।’ त्यसैगरी, आफ्नो शिक्षण कलाकै कारण प्रश्नको उत्तर दिन पनि सहज भएको उनको भनाइ छ । उपाधि जितिसकेपछि पनि आफ्नो विद्यार्थीहरुबाट आएको असङ्ख्य बधाई तथा उल्लासपूर्ण प्रतिक्रियाहरुबाट उनी सन्तुष्ट छन् ।
उनकी श्रीमती पनि मोडलिङमै रुचि राख्ने भएकाले व्यक्तिगत जीवनले व्यवसायिक जीवनमा कुनै असर पारेको छैन । त्यसो त उनीहरुको भेट पनि फेसन शो मै भएको थियो ।
प्रतियोगिताले महिला फ्यानहरु त टन्नै दियो होला नि भन्ने हाम्रो प्रश्नमा उनले मुस्कुराउँदै उत्तर दिए ‘धेरै होइन केही । तर, म विवाहित हो ।’ उनले तीन वर्षअघि विवाह गरेका हुन् । उनकी श्रीमती पनि मोडलिङमै रुचि राख्ने भएकाले व्यक्तिगत जीवनले व्यवसायिक जीवनमा कुनै असर पारेको छैन । त्यसो त उनीहरुको भेट पनि फेसन शो मै भएको थियो । एक अर्कासँग मन मिलेपछि उनीहरु विवाह बन्धनमा बाँधिएका थिए । उनकी श्रीमती अमाजोन इन्टरटेन्मेन्टले नै आयोजना गरेको मिसेस ग्लोबल नेपाल २०१८ मा थर्ड रनर अप भएकी छिन् ।
‘त्यसैले मोडलिङमै करियर बनाउन मलाई कुनै समस्या छैन ।’ मिलनले दङ्ग पर्दै बताए ।
मिस्टर ह्यान्डसम नेपाल २०१८ को पहिलो श्रङ्खलाका विजेता मिलन रेग्मीलाई लोकपथ परिवारको तर्फबाट बधाई एवम् शुभकामना ।
यो खबर पढेर तपाईलाई कस्तो महसुस भयो ?
प्रतिक्रिया