काठमाडौं । साफ यू-१८ महिला च्याम्पियनसिपमा उपविजेता बनेको नेपाली महिला फुटबल टोली बुधवार स्वदेश फर्किएको छ ।
नेपाली खेलाडीसहितको टोलीलाई त्रिभुवन अन्तर्राष्ट्रिय विमानस्थलमा अखिल नेपाल फुटबल संघ ‘एन्फा’का अध्यक्ष कर्मा छिरिङ शेर्पालगायत एन्फा पदाधिकारीले स्वागत गरेका थिए ।
भुटानमा सम्पन्न साफ फुटबल प्रतियोगिताको फाइनलमा नेपाल बंगलादेशसँग पराजित भएको हो । यही असोज २१ गते सम्पन्न फाइनलमा नेपाल बंगलादेशसँग १–० गोलअन्तरले पराजित भएको थियो ।
सेमिफाइनलमा नेपालले भारतलाई पेनाल्टी सुटआउटमा ३–१ गोलअन्तरले पराजित गरी फाइनलमा स्थान बनाएको थियो । उपविजेता बनेको यु–१८ महिला राष्ट्रिय फुटबल टोलीका प्रत्येक सदस्यलाई एन्फाले जनही ५० हजार पुरस्कार दिने घोषणा गरेको छ ।
यो खबर पढेर तपाईलाई कस्तो महसुस भयो ?
प्रतिक्रिया