भैरहवा । पर्यटन व्यवसायीले ४३औँ विश्व पर्यटन दिवसको सन्दर्भ पारेर होटलमा २० प्रतिशत छुट दिने घोषणा गरेका छन् । विश्व पर्यटन दिवसको अवसरमा पर्यटकहरूलाई लक्षित गर्दै निजी क्षेत्रले विशेष योजना ल्याएका हुन् ।
सहरी विकास मन्त्रालय लुम्बिनी प्रदेशद्वारा गठित विश्व पर्यटन दिवस मुल समारोह समितिले गरेको छलफल तथा पत्रकार सम्मेलनमा आयोजकले योजनाबारे जानकारी गराएका हुन् । कोभिडले शून्य अवस्थामा पुगेको पर्यटनलाई यो छुटले राहत मिल्ने विश्वस लिइएको छ ।
लुम्बिनी प्रदेश पर्यटनको हिसाबले धेरै सम्भावना बोकेको ठाँउ हो । स्थलमार्ग भएर आउने सबैभन्दा बढी पर्यटक रुपन्देहीको बेलहिया हुँदै नेपाल भित्रिने भएकोले सोहीलाई क्षेत्रललाई मध्यनजर गर्दै पर्यटन उत्थानका लागि विशेष छुट दिन लागिएको हो ।
‘पर्यटनको लागि पुनर्विचार’ गरौं भन्ने मूल नाराका साथ २७ सेप्टेम्बरमा मनाउन लागिएको विशेष कार्यक्रमका लागि विदेशी पर्यटकलाई विशेष अफर दिन लागिएको विश्व पर्यटन दिवस मूल समारोह समितिका संयोजक चन्द्रप्रकाश श्रेष्ठले बताए । पर्यटन ग्रामिण तथा सहरी विकास मन्त्रालय लुम्बिनी प्रदेशको अगुवाईमा पर्यटन क्षेत्रसँग सम्बद्ध विभिन्न संघसंस्थाको सहकार्यमा त्यस्तो प्याकेजको घोषणा गरिएको हो ।
दिवसको अवसरमा ११ असोजमा स्थलमार्ग हुँदै भित्रिने बेलहियाका दुई जना र अन्तर्राष्ट्रिय गौतमबुद्ध विमानस्थल भैरहवामा सबैभन्दा पहिले आउने विदेशी चारजना गरी ६ जना पर्यटकलाई सम्मान गर्ने र उनीहरूलाई सोही दिन तारे होटलमा आवास, खाना र पर्यटकीय गन्तब्यमा घुम्नको लागि गाडीको निःशुल्क व्यवस्था गरिएको बताए । अन्य विदेशी पर्यटकको हकमा भने २० प्रतिशत छुट ६ महिनासम्म लागु रहने उनले भने ।
पर्यटनको लागि पुनर्विचार गरौ (रिथिंङकीङ टुरिजम) भन्ने अभियानका साथ विश्वभर यसवर्ष २७ सेप्टेम्बर अर्थात आगामी ११ असोजमा विश्व पर्यटन दिवस मनाउन थालिएको हो । सोहीअनुसार लुम्बिनी प्रदेशमा पनि पर्यटक विशेष कार्यक्रम गर्न थालिएको पर्यटन विकास परिषद लुम्बिनीका कार्यकारी प्रमुख रामु जोशीले बताए ।
ग्रामिण तथा सहरी विकास मन्त्रालयका सचिव जक्की अहमद अन्सारीले लुम्बिनी प्रदेश सरकारले पर्यटकहरुलाई विशेष प्राथमिकतामा राखेर विभिन्न कार्यक्रम गर्ने बताए । भारत र नेपालका कतिपय संस्कृति मिल्ने भएकाले पनि दुई देशका पर्यटक आवागमनमा सहजता अपनाउनु पर्ने उल्लेख गरे ।
नेपाल एशोसियसन अफ ट्राभल्स एन्ड टुर एजेन्ट (नाट्टा) लुम्बिनी प्रदेशका वरिष्ठ उपाध्यक्ष चन्द्रबहादुर थापाले पर्यटकलाई सहज रुपमा नेपाल घुमाउने र खुसीका साथ स्वदेश फर्काउनेगरी तयारी गरिहेको बताए ।
बेलहियामा एक दशकदेखि हरेक वर्ष २७ सेप्टेम्बरमा पर्यटनसम्बन्धी विभिन्न कार्यक्रम हुँदै आएका छन् । सन् १९९७ को संयुक्त राष्ट्रसंघीय अवधारणा बनेपछि सन् १९८० देखि २७ सेप्टेम्बरकाका दिन विश्वभर विविध कार्यक्रम गरी विश्व पर्यटन दिवस मनाउन थालिएको विश्व पर्यटन दिवस मुल समारोह समिति लुम्बिनी प्रदेशका सदस्य नरेश केसीले बताए ।
यो खबर पढेर तपाईलाई कस्तो महसुस भयो ?
प्रतिक्रिया