एजेन्सी । चेल्सी काराबाओ कप फुटबलको क्वाटरफाइनलमा प्रवेश गरेको छ ।
आफ्नो घरेलु मैदान स्टामफोर्ड ब्रिजमा बुधवार राति सम्पन्न भएको चौथो चरणको खेलमा चेल्सीले डर्बी काउन्टीलाई ३-२ गोल अन्तरले पराजित गर्दै अघिल्लो चरणको यात्रा तय गरेको हो ।
चेल्सीले खेलमा दुई आत्मघाती गोल उपहार पाएको थियो । खेल शुरु भएको ५ मिनेट पनि बित्न नपाउँदै डर्बी काउन्टीका फिकायो टोमारीले आत्मघाती गोल गरे र चेल्सीलाई १-० को अग्रता दिलाए ।
नवौं मिनेटमा डर्बी काउन्टीका लागि ज्याक मोरियोटले पहिलो गोल गर्दै खेललाई एक-एक गोलको बराबरीमा ल्याए ।
२१ औँ मिनेटमा पुन डर्बीले आत्मघाती गोल ग-यो । रिचार्ड क्योगले आत्मघाती गोल गरेपछि चेल्सीले खेलमा २-१ को अग्रता बनायो । तर, २७ औँ मिनेटमा डर्बी काउन्टीका लागि मार्टेन वागहनले गोल गर्दै खेललाई दुई-दुई गोलको स्थितीमा ल्याउन सफल भए ।
प्रतिस्पर्धात्मक खेलको ४१ औँ मिनेटमा चेल्सीका लागि सेस फ्रयाब्रिगासले गोल गरे र खेललाई ३-२ को स्थितीमा पु-याए ।
दोस्रो हाफमा भने दुवै क्लब गोल गर्न असफल भयो । निक्कै रोमाञ्चक बनेको खेलको निर्धारित समयसम्म दुवै क्लबले केही गोल गर्ने मौका पाएपनि सदुपयोग भने गर्न सकेन ।
अब चेल्सीले सेमिफाइनल प्रवेशको लागि बर्नमाउथसँग प्रतिस्पर्धा गर्नेछ ।
यो खबर पढेर तपाईलाई कस्तो महसुस भयो ?
प्रतिक्रिया