‘वीर विक्रम २’ बन्ने, वर्षासँगै आकाश र नाजिर अनुबन्ध

लोकपथ संवाददाता

२०७५,कार्तिक,१५,बिहीवार १३:४१

काडमाडौं । मिलन चाम्सले निर्देशन गरेको फिल्ममध्ये राम्रै चर्चा कमाएको फिल्म ‘वीर विक्रम’ को नाम सापटी लिएर ‘वीर विक्रम २’ निर्माण हुने भएको छ । काठमाडौंमा एक कार्यक्रमको आयोजना गरी फिल्मको औपचारिक घोषणा गरियो ।

‘वीर विक्रम’ का नाजिर हुसेन दोहोरिएका छन् भने अन्य कलाकार नयाँ छन् । निर्माण हुने भनिएको फिल्ममा दयाहाङ राई, अनुपविक्रम शाही र फिल्मकी नायिका दिया पुन रहने छैनन् । निर्देशक मिलन चाम्सले फिल्मको कथा पहिलेको फिल्मसँग नमिल्ने बताए ।

चलचित्रको कथा पत्रकार सुशील पौडेलले लेखेका हुन् । यस्तै फिल्ममा नाजिरसँगै आकाश श्रेष्ठ, वर्षा शिवाकोटी, बुद्धि तामाङ, मनोज केसी, विनिषा भण्डारी लगायतका कलाकारको मुख्य भूमिका रहनेछ । चलचित्रको कथामा संवाद भने प्रदीप भारद्वाजका रहनेछन् । यस्तै फिल्मको कोरियोग्राफीको जिम्मा कविराज गहतराजले सम्हाल्ने छन् ।