काठमाडौं । केही वर्षअघि बजारमा चलेका नायिकाहरु यतिबेला खासै चर्चामा छैनन् । उनीहरु सामाजिक सञ्जालमा बढी सक्रिय देखिन्छन् । टिकटक लगायतका सामाजिक सञ्जालमा भिडियो बनाएर बस्छन् । हिजो टिकटकमा भिडियो बनाएर बस्ने कतिपय नायिकाहरु भने अहिले थोरै व्यस्त देखिन थालेका छन् ।
यतिबेला आँचल शर्मा, जसिता गुरुङ, स्वस्तिमा खड्का, साम्राज्ञी राज्यलक्ष्मी शाह लगायतका नायिकाहरु चर्चामा छन् । यिनै नायिकाहरुको हातमा फिल्म गइरहेको हुन्छ । अफर पनि पाइरहेका हुन्छन् । चलचित्र ‘शत्रु गते’ मा चेपुवामा परेपछि आँचल शर्माले सोलो फिल्ममा काम गर्ने बताएकी थिइन् । तर, लामो समयसम्म पनि उनको हातमा भनेजस्तो फिल्म नपरेपछि फेरि उनी ‘शत्रु गते’ जस्तै धेरै कलाकार भएको फिल्ममा अभिनय गर्ने भएकी छिन् ।
चलचित्र ‘दाल, भात, तरकारी’ मा अभिनय गर्न भनेर सबैभन्दा पहिले फिल्म साइन गरेकी स्वस्तिमाले फिल्ममा काम नगर्ने बताएपछि निर्माण टिमसँगको सहमतिमै स्वस्तिमाको ठाउँमा आँचल शर्मालाई लिएको फिल्मका प्रस्तुतकर्ता किरण केसीले बताए ।
उता स्वस्तिमा अब यो फिल्म छोडेसँगै विकास राज आचार्यको फिल्म ‘हजार जुनीसम्म’ का लागि समय दिनेछिन् । बुझिएअनुसार स्वस्तिमाले दुई फिल्मको छायांकन मिति जुध्नाले ‘दाल, भात, तरकारी’ लाई छोडेकी हुन् ।
कमेडी भनिएको फिल्म ‘दाल, भात, तरकारी’ मा आँचलसँगै मदनकृष्ण श्रेष्ठ, हरिवंश आचार्य, निरुता सिंह, पुष्प खड्का, प्रियंका कार्की, वर्षा राउत लगायतका कलाकारको अभिनय रहनेछ । फिल्ममा किरण केसी प्रस्तुतकर्ताका रुपमा छन् भने उनकै छोरा सुदन केसीले फिल्म निर्देशन गर्नेछन् ।
यो खबर पढेर तपाईलाई कस्तो महसुस भयो ?
प्रतिक्रिया